本來噚日見到個市好似有啲希望咁，估佢都會帶動埋條恒科指造好，結果等到下晝，恒指同恒科指都開始進入悶局，再加上睇返恒科指日線圖，指數前日(11月16日)已經上到100天線，及至噚日都仲有成功上破，正所謂：唔破就跌，唔結就分，怪不得今日恒科指下跌，還好噚日已經提醒自己要搵位走隻恒科牛(59544)，最後喺噚日下半場3點至3點10分，見到恒科指五分鐘圖Slow STC(14,3)兩線上到超買水平，望望(59544)高低位做過0.074元/0.073元，平均走佬價為0.0735元，對比之前嘅平均買入價0.073元，哼，隨時手費續都唔夠比。
今朝恒指跌280點開市，指數由原先近熊證街貨層變成近牛證街貨層，開市前已經喺聊天室度同大家開可以開淡倉，本身諗住用返爬格仔策略，結果爬下爬下，就爬到依家10點22分，恒指穿過25300點，依家報25293點，跌356點，喺五分鐘圖上面見到指數行出咗「錘頭」嘅物體，所以喺聊天室開市追淡倉嘅行動亦都告一段落。
不過，我都知道有戰友手持恒指Put做一啲比較長線少少嘅看淡部署，睇返日線圖見指數目前低於20天線，但剛好又被10天線同50天線支持住，同步見到Slow STC(14,3)兩線作勢於高位回落，真係一副Put樣出晒嚟。
恒指熊(67138)，收回價25768點，同現價有逾500點差距，約35.55倍槓桿其實Day trade都可以，反正依家指數靠近牛證街貨，且最低(截至10點35分止)做過25222點，隨時今日25200至25299點全層死晒都未定，吼五分鐘圖見Slow STC(14,3)上返超買水平出場比較安全。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
即市聊天室/Patreon：https://www.patreon.com/cbbcwar
FB：https://www.facebook.com/cbbcwar
