我有甲亢呢個病都有一班熟嘅朋友一早知道，醫生都睇晒只係等今個星期再去轉科，但喺未捱到睇專科時(已經book私家架啦)，喺上個星期五(11月12日)凌晨因為食藥都未能減慢到甲亢其中一個病徵心跳快，喺跳到130幾嘅情況下我家老爺唯有call白車送我入廠，認真，咁大個女第一次call車入醫院，的確係得到一啲新嘅experience。大家放心，我今個星期正正式式睇專科，人緊要過稿嘛，我知啦！多謝大家各種形形式式嘅關心同問候。
今朝起身睇電話時，見到輪商好友Eva send咗個mnessage過嚟，原來喺新城財經台fb嘅screen cap，仲叫我加油。係呀，未入廠之前幫佢哋錄咗一個節目，而平日都有同佢哋錄一截好短嘅環節，五分鐘到啦，始終我唔擅長講嘢嘛。
依家9點47分，久違了嘅聊天室再次同一班戰友一齊落場，呢幾日仲有好多新加入嘅朋友，多謝大家嘅體諒同等待，今朝恒指開市先升110點，再上到25400點以上水平，「會唔會又高開低走？」好難講事關指數近熊證街貨，只係熊證街貨比牛證街貨真係少得多，隨時指數喺牛熊街貨中間搵吉一陣先至再殺街貨都唔定。
依家10點3分，指數話咁快又高開低走仲倒跌，好彩喺聊天室裡面見到粒疑似「射擊之星」嘅物體出淡倉，一淡指數向下，但見五分鐘圖好鬼多天線又好鬼近，唯有逐層逐層向下殺，殺到落250分鐘線(五分鐘圖50線)就開始停兼見橫行。
依家10點29分，見指數喺五分鐘圖咬完條保歷加通道中軸後有開始向下行嘅情況，可惜保歷加通道仍然未見有拓闊嘅走勢。換個日線圖見指數被20天線同50天線挾住，呢個情況都維持咗兩個交易日，短線嘅隨時文章見街之後個市都唔同樣，以日線圖炒嘅都係等埋指數點走先至再出手都未遲。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
即市聊天室/Patreon：https://www.patreon.com/cbbcwar
FB：https://www.facebook.com/cbbcwar
