噚日恒指喺下半場真係見到Slow STC(14,3)上到超買，但同時都見保歷加通道口拓闊，本來想打算見Slow STC(14,3)確認到高位回落嘅時候，先至偷位出隻恒指熊(68793)，博指數向下回落。但博乜鬼，恒指愈升愈有，仲到升上去高249000點樓上，全日行出「大圓底」仲上破埋頸線，好彩(68793)無出到場，但見住指數係咁上，本身心跳已經快，愈睇愈快，好彩聊天室戰友們醒水出好倉去追，仲見好識收，怕且個聊天室遲啲可以收檔。
今朝恒指完咗U盤之後見指數跌百幾點開市，喺五分鐘圖見指數跌返落去保歷加通道中軸以下，激氣，本來以為指數會繼續向下殺近街貨，但原來仍然都係敵不過Slow STC(14,3)超買要Swing返落去。不過，當正式開市後見指數咬住保歷加通道中軸，Slow STC(14,3)兩線呈下都喺聊天室叫出淡倉，結果睇錯方向，指數喺未到10點之後前爆上一下，唯有全線轍退並反手出好倉；只不過，指數上到25100點樓上之後，25000至25099點熊證全死，但換來嘅係喺五分鐘圖上見指數行出疑似「射擊之星」嘅物體，唉，莫講話左一巴，右一巴，都唔知幾多巴；有戰友問我係咪因為甲亢搞到失眠而唔夠精神，關咩事，睇錯就係睇錯架啦。
依家10點30分，指數喺五分鐘圖出完「墓碑十字星」之後果然回落，但回落到去保歷加通道中軸後又見停。再過多20分鐘，同我老友強少and聊天室嘅戰友分享一下我噚日收市後去過電台嘅事之後，恒指終於肯向下爆落，同步都見保歷加通道底有少少有行嘅情況。
再望返今日恒指牛熊證街貨圖，見牛證最貼價雖然喺24400至24499點，但過千張期指街貨真係好吸引。恒指熊(66923)，收回價25378點，同現價有逾400點差距，再出熊未需要睇到殺第一層牛證街貨咁遠，只係見保歷加通道口繼續拓闊，似比位指數再落咁啫，安全嘅等返Slow STC(14,3)喺五分鐘圖上重上超買水平先啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
即市聊天室/Patreon：https://www.patreon.com/cbbcwar
FB：https://www.facebook.com/cbbcwar
