雖然美國政府從8月起採取非常規措施，以應付日常開支及支付債息，但財長耶媽已表明，呢啲措施並未足以支付10月18日之後嘅帳單，一直被視為無風險嘅美國債券，正面臨史上首次債務違約危機。國際評級機構惠譽表示，如果國會未能夠及時解決債務上限問題，令財政部推遲兌付或違約，美國嘅AAA地位也可能受到威脅。
一旦美債違約，不單削弱美國剛從疫情開始復甦嘅經濟，並對美國嘅國際地位造成永久性傷害。市場正關注美國兩黨能否喺限期前，達成調高債務上限協議。雖然阿Man認為最終兩黨可達成協議，避免美國陷入違約危機，但喺達成協議之前，美股將極為波動。
目前美國兩年期及十年期國債孳息之間息差正持續拉闊，而兩者嘅息差係反映經濟放緩或過熱嘅指標。過往歷史資料顯示，0至150點子之間嘅息差，係對股市有利嘅區間，當息差擴大至超過150點，股市或面臨較大幅度調整。而目前孳息曲線正反映息差持續擴闊，通脹有機會步向失控，聯儲局將逼不已迅速收水，以及加快加息步伐，屆時美股定必出現大幅度調整。美股連續兩日下跌，拖累港股再創今年新低。
恒指低開264點，報23771，跌幅曾擴大至354點，見半日低位兼一年新低23681點，低位見買盤入場，大市止跌回升，重上兩萬四水平，半日最多升91點，見24127點。中午恒指半日收報24112，升76點；國指午造8530，升9點；恒科指跌12點，報收5961。不過北水繼續缺席，半日成交只有602.4億元。
藍籌個別發展，ATMX之中，只有小米(01810)上升，ATM下跌，阿里(09988)半日再跌1.6%，更創132元上市新低；美團(03690)跌1.1%；騰訊(00700)半日跌1.8%。再睇埋港交所(00388)亦唔多精神，其實呢幾隻重磅股暫時唔精神嘅話，大市難言回穩，更莫講話可以見底回升。
紐約期油創7年高位，石油股走高，中石油(00857)半日升5.1%，為最大升幅藍籌股，中海油(00883)跟中石化(00386)半日齊齊升逾2%，連帶油服股亦有資金追捧，得到阿聯酋公司鑽桿供應合同嘅海隆(01623)，半日更爆升四成。資源股喺油股帶動下造好，煤炭股早段升幅較大，不過內地表示希望產電正常化，意味阿爺唔想煤炭價格持續高企，唔知遲吓有冇可能整個煤炭限價令，阿Man就唔建議高追煤炭股。
恒大(03333)事件未解決，又輪到花樣年(01777)2億美元票據還唔到本金，市場擔心內房資金鏈問題，內房股今早捱沽。阿Man講咗喺恒大事件未明朗化之前，內房資金緊絀及融資成本上漲問題會持續困擾呢個板塊，暫時內房股都係偏弱，咪見彈嗰一日半日又多手撈貨。
麥狄文
(徐狄怡‧證監會持牌人)
