有個喜訊想同大家開心share，好無聊的，話說一個月之領養咗一隻流浪貓返屋企，由初初匿埋一二角，成鬼日fee我同我家老爺，到噚晚佢忽然主動伸隻手出嚟掂我同我家老爺嘅手，今次係無爪，純綷只係feel到佢嘅肉球。我舅父Eric都有養貓，佢講得好啱，當你花心機、時間同耐性對佢，佢係會feel到，會開始相信你同會主動，就好有成功感。原來係真架。
今日恒指開市都係微開，報25524點，微跌15點。聊天室營運埋今個星期就會停一停，無他嘅，純綷個人想偷懶一個月咁啫，10月就會再喺第二個地方蒲頭，所以都開始陸續有戰友個課金Plan去到今個星期完，所以都講定後會有期；個別幾個更加同我戰鬥到最後一日。唔呃你，無啦啦喺網上識到一班人而大家除咗股票之外都仲有其他話題，平時你串我、我潤你，成班人都玩得又笑得係一件好難得嘅事，有無聊天室都好，相信呢一班一定會繼續盛傳落去。
嚟到9點35分，恒指正式開市，一度跌過百點，小時圖上見依家支陰燭生咗長下影線出嚟，插穿過保歷加通道中軸；不過，喺五分鐘圖上則見今朝早開市呢支「大陰燭」其實一下子已經穿到去保歷加通道底線，所以無幾耐指數跌幅似有收窄嘅情況，觀乎Slow STC(14,3)兩線勢頭仍呈向，唯一方法就係等保歷加通道口拓唔拓闊，比位指數順Slow STC(14,3)向下落，還是唔郁/收窄，夾返條指數上去。
噚日戰友Jack send咗條新聞比我，內容係：國家新聞出版署下發《關於進一步嚴格管理 切實防止未成年人沉迷網絡遊戲的通知》。通知要求，嚴格限制向未成年人提供網絡遊戲服務的時間，所有網絡遊戲企業僅可在周五、周六、周日和法定節假日每日20時至21時向未成年人提供一小時服務，其他時間均不得以任何形式向未成年人提供網絡遊戲服務。呢條新聞我即時再forward過去聊天室，今朝已經有戰友問定騰訊(00700)熊做DT，最衰網易(09999)、IGG(00799)、心動公司(02600)等無看淡產品，如果唔係Put/熊埋佢一份。
無辦法啦，唯有向騰訊埋手。五分鐘圖上見騰訊股價今早低開後依家繼續向下落，Slow STC(14,3)兩線向見向下。截至依家9點49分止，Slow STC(14,3)兩線已回落到超賣範圍，不過保歷加通道口卻明顯拓闊，完全無收口嘅跡象。
換上小時圖的話，則見股價目前仍守穩於20小時線(小時圖20線)，但同時亦受制於10小時線(小時圖10線)，保歷加通道口雖然無好似五分鐘圖嗰一個咁拓得咁闊，不過都係未見收窄，至於Slow STC(14,3)即使兩線唔係處於超買水平，但都開始見%K線想回頭穿過%D線。
再睇埋日線圖，依家見今日粒小陰燭卡住喺保歷加通道中軸，但數值上只實股價已經跌穿咗保歷加通道中軸，換言之股價目前處於保歷加下降通道運行，而SLow STC(14,3)喺日線圖上嘅轉勢似乎比小時圖更為明顯。騰訊熊(61736)，收回價495元，同現價有逾8%差距，逾11倍槓桿夠今日DT用。
至於噚日隻吉利(00175)，喺【輪證下半Part】有講過等吉利五分鐘圖保歷加通道口拓闊時再處理隻牛證(54754)，結果等咗成日都無等到保歷加通道口拓闊，反而等到Slow STC(14,3)上返去90以上嘅嚴重超買水平，仲要係籵下晝3點5分至3點50分呢段長時間，坦白講Slow STC(14,3)頂住咁長時間嘅超買再超買，都頂唔開條保歷加通道口，佢都真係仁至義盡，就當喺返呢段時間沽走隻(54754)，以期內高低位0.07元/0.069元計，平均走貨價為0.0695元，其實同噚日嘅平均買入價0.07元相約但輸手續費，希望今日隻(61736)幫補下啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
