噚日weekend獨留我家肥貓在家，同我家教爺兩個落樓下個商場行個圈做下採購，入到超市行到凍櫃見到一堆湯圓拎晒出嚟賣，呀！下個月就係中秋節，還記得細個住喺牛下時，婆婆每年都會搓湯圓比我同舅父食，裡面嗰餡就係婆婆砌好咗嘅片糖，我同舅父兩個負責包，但由於片糖數量有限(要留返啲用嚟加薑煮湯)，所以都會有啲湯圓係無餡；唔知係咪因為細個食開無餡湯圓嘅關係，大個覺得有餡湯圓好似怪怪的，尤其是噚日喺超市見到嗰包脆脆朱古力湯圓...唔知你哋中秋節時會唔會同屋企一圍埋一齊食湯圓，甚至好似我細個咁，一家人搓湯圓食呢？(放心，我婆婆仲喺度嘅，前個星期先同佢食完飯)
依家9點25分，恒指開市報25406點，微跌1點，咁樣開法都真係要等9點半正式開市事先搵到/諗到有咩好做。呢個時侯望望恒指牛熊街貨圖，見到牛熊兩邊都有新增街貨層，熊證最貼價層落到25600至25699點；而牛證最貼價層上至25300至25399點，呢兩層新增層嘅街貨都唔多，各自得10張都無。望望月曆，今日除咗係美團(03690)公布業績之外，仲係期結日，雖然10次有8次期結日都係升市，不過呢個又唔係定律嚟嘅。
嚟到依家9點48分，見到恒指開市倒升後又再下行，依家做緊25282點，跌125點，最低見過25219點，換言之牛證第一層25300至25399點嘅街貨全數死亡，至於25200至25299點呢層基本上爭19點就死晒，而呢層有相當於174張期指，又真係唔可以當呢一層都死埋嘅。
再過多幾分鐘，喺五分鐘圖上見指數有跌定嘅情況，Slow STC(14,3)都已經落返去超賣水平。未幾，恒指忽然一個回馬槍將跌幅大為收窄，本來都有同聊天室嘅戰友講定偷位出好倉 要留意指數可唔可以上破得到50分鐘線(五分鐘圖10線)同100分鐘線(五分鐘圖20線)，不過，喺五分鐘圖上見一支「大陽燭」一口氣上破50分鐘線同100分鐘線，同步Slow STC(14,3)亦見觸底反彈，快到只有1分鐘嘅時間，邊度可以追得切，唯有再觀察指數喺五分鐘圖上守唔守得穩條100分鐘線再作打算。
頭先講起美團，八掛股價見今朝都好似之前咁，日線圖上見股價喺20天線上橫行，而Slow STC(14,3)今日見兩線重疊並處於接近超買水平嘅中軸範圍，未見異樣。向其他個股發掘一下，見到隻吉利汽車(00175)今日彈得唔錯，日線圖上剛好破到條20天線，同步亦見Slow STC(14,3)兩線觸底回升，唔通班車迷追比亞迪(01211)追到氣咳，換換場景去追吉利？
吉利牛(54754)，收回價24元，同現價有大約9.6%差距，屬安全之選，一如以往等吉利五分鐘圖Slow STC(14,3)回返落嚟時先出手啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
