噚日揀咗隻恒指牛(60004)出嚟，喺醒半場完結時見恒指五分鐘圖指數落到100分鐘線(五分鐘圖20線)，到下半場開市後見指數有支持喎，於是就隊隻(60004)落場，以下半場開市後首10分鐘計，(60004)平均買入價為0.0755元。激氣！呢頭入完嗰頭指數掉頭向下仲插穿返條100分鐘線，所以喺【輪證下半Part】FB Upload個圖時都寫明自己GG咗，唯一嘅方法就係搵逃生門。
喺下晝2點15分左右，舊場Designer Ken whatsapp笑我GG了，仲問我「係咪即係又落番地獄」，本來諗住破返上條100分鐘線就閃人，但等到2點40分，指數都仲係咬住100分鐘線唔放，唉！你贏啦！我輸啦，以等咗成差唔多半個鐘都爬唔到上100分鐘線呢段時間掉走隻(60004)計，期內高低位做過0.074元/0.073元，平均著草價為0.0735元，輸5.2%；本來Ken仲叫我搵返我哋以前燈神同事Wilson買隻FI二南方恒指(07500)沖沖佢，咪啦，反正我都部緊隻港交所(00388)淡倉，Wilson：見字買港交所Please！
今朝恒指開市又係玩微開，跌23點，開市報27972點。至依家9點40分，恒指點數仍然未有異樣，八掛下啲個股，見到港交所日線圖Slow STC(14,3)%K線終於高位跌穿%D線，正當打算吼隻淡倉出擊時，再望下小時圖就發現條保歷加通道口勁窄。等到9點47分，恒指向下走多幾步，港交所股價都見有跟到，同時小時圖保歷加通道口都開始有拓闊嘅情況，雖然Slow STC(14,3)未算係勁高位回落，不過小注出唔係無可能；安全嘅當然可以等五分鐘圖Slow STC(14,3)上返去超買水平先至出手啦，始終依家喺五分鐘圖上見到Slow STC(14,3)已經落到去嚴重超賣嘅範圍，進取嘅又可以試下等股價喺五分鐘圖上會唔會受制於50分鐘線(五分鐘圖10線)或100分鐘線(五分鐘圖20線)，港交熊(50213)，收回價520元，同現價有逾3%差距，逾25倍槓桿都夠Day Trade用。
依家9點57分，恒指跌幅又進一步擴大至跌逾100點，望住港交所五分鐘圖見由原先以為501元出「平底」，退守到500元見「平底」，家下連500元都一度失守過，500元呢個「啡底」似乎又再次受到考驗。坐喺廳度忽然覺得好暗，望望窗見到出面已經有舊黑雲飄緊埋嚟。依家10點1分，第二粒小時圖嘅燭已經出現，見股價同保歷加通道底重疊之餘，保歷加通道口都見到有少少拓闊嘅情況，只係五分鐘圖Slow STC(14,3)似乎有力想托返港交所上去。
嚟到10點10分，港交所喺五分鐘圖已見股價上破50分鐘線，唉，明明吼準佢日線圖條Slow STC(14,3)轉角，但就係仲未捉到落場點，唯有繼續等，學老爸話齋：好嘢係要等嘅。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
