早排上網買咗本經濟學嘅書，係呀！終於有時間可以睇一本一直都想睇好耐嘅書，之前怕連睇個封面嘅時間都無，所以連買都費事。噚日朝早收到郵局SMS話本書已經到咗，諗住收市之後做埋少少手尾換件衫就落隔離村間郵局去拎，行到附近時見到門口無人排隊喎，心諗：掂呀呢鋪！行到正門嘅時侯「咦？裡面有人但係又閂咗門，熄咗啲燈嘅？我無行錯路呀！」再望清楚門口張紙「消毒清潔」？唔通今日郵局要進行「消毒清潔」？再望高少少「星期一至五...至下午四時半」？乜郵局原來閂四點半架？白行一趟。
今朝又係早早就醒咗，因為近排都有啲嘢忙，望望鐘原來已經9點32分，見今朝恒指開市微升1點，到依家向下跌過100點，其實喺噚日嘅【輪證下半Part】都有提過恒指喺日線圖上，剛剛上到大型「楔形」底兼有10天線做阻力，再加上噚日收市28000點得而復失，以及小時圖都見Slow STC(14,3)高位回落中，似乎早幾日指數落到250天線「八連跌」大回之後嘅小漲隨時完成。
嚟到9點41分，指數仍然保持百零點嘅跌幅，今日可能除咗發盈喜嘅藥明(02269)暫時見升逾一成有啲起色之外，似乎其他個股走勢都比較偏弱。基於恒指開市後無耐走勢下行，所以都有同聊天室嘅戰友講定可以淡倉追擊小時圖條Slow STC(14,3)，不過，要睇住小時圖上有10小時線(小時圖10線)同埋50小時線(小時圖50線)作勢做支持。
恒指熊(61363)，收回價28500點，同現價有逾700點差距，低街貨、槓桿偏高，如果都想追擊小時圖條Slow STC(14,3)的話，安全嘅可以等小時圖確認跌穿10小時線同50小時線先出手，又或者等恒指五分鐘圖Slow STC(14,3)回頭再嚟多次下行時出手。
今朝早我家老爺千叮萬囑提我兩個可愛嘅外甥女生日(係呀！兩姊妹同月同日，緣份)，其中一個仲喺呢個暑假一路等DSE放榜，一路幫我呢個舅母畫緊嚟緊會出嘅四本技術分析電子書嘅封面，蔚蔚&昕昕，生日快樂啦！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
