噚日喺下半場本打算見到恒指小時圖破唔到條10小時線(小時圖10線)出淡倉，呢頭打完篇文Post出嚟，嗰頭指數喺五分鐘圖又落到底，FB上文都妖咗佢一下，幸好有聊天室可以同戰友即時講可以準備反手，最後都捉得到尾市段升勢。
今朝早落街如常行去地鐵站，還好買到份《蘋果》比我今朝做「早餐」，返到嚟9點52分，見到恒指由今朝早U盤後報升20幾點之後就一直係咁飆，到依家見恒指上到28777點，升219點，暫時最高做過28830點，換言之恒指首層熊證街貨已全數死亡。
再到9點59分，喺恒指五分鐘圖上已經見到Slow STC(14,3)兩線上到嚴重超買水平後下行，陰陽燭圖上都出現咗一粒「射擊之星」嘅物體，跟手接住就有兩支陰燭出現，Slow STC(14,3)都再見向下，於是拿拿聲同聊天室嘅戰友講可以小注出淡倉，以爬格仔心態向下望住最近嘅天線做目標(通常都係50分鐘線(五分鐘圖10線))；安全啲再睇返條小時圖，雖然Slow STC(14,3)兩線勢頭仍然向上，但同步都見到保歷加通道口收窄，如果係想玩耐少少，唔用五分鐘圖去追的話，就比啲時間等下到底小時圖上會係Slow STC(14,3)幫手頂返保歷加通道口拓闊，令指數繼續去，還是保歷加通道口收窄夾返低條Slow STC(14,3)啦。
早幾日有睇過隻友邦(01299)，指日線圖見見Slow STC(14,3)喺嚴重超賣水平低位回升，股價有望可以轉勢，去到今日見佢係94至95元橫行，今日頭頂有條10天線(95.97元)喺度，似乎都係要再比多少少時間先得。
返轉頭再睇返恒指，依家10點11分，指數回落至接近50分鐘線後再上，如同之前喺聊天室所講爬格仔落到最近嘅天線作為目標先，爬格目標已到，同步見Slow STC(14,3)於70附近又再轉勢，順勢而上的話呢個位出隻恒指牛(63445)，收回價28194點，同現價有約580點差距，槓桿偏高；一旦五分鐘圖穿50分鐘線或100分鐘線(五分鐘圖20線)，就可能隨時要走佬啦。安全嘅亦都可以等五分鐘圖上Slow STC(14,3)回落到超賣水平時見回升先進場。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon【每日一股】：https://www.patreon.com/cbbcwar
秒投聊天室：https://bit.ly/31HG6AN
