噚日手上揸住隻恒指熊(68807)，喺噚日2點13分時見到隻(68807)非常安好，但去到噚日下朝2點40分至2點50分，恒指喺五分鐘圖上忽然上破保歷加通道中軸，小時圖走勢都見有輕微變化(無計，噚日波幅始終太少，有輕微變化對個市嚟講已經係變化)，尾市仲見愈升愈有，令恒指跌幅有所收窄，喺3點10分時其實見到指數上破咗小時圖嘅保歷加通道中軸，按照策略，恒指小時圖一過到保歷加通道中軸就要棄守(68807)，就當比10分鐘時間去進行止蝕，按照嗰段時間(68807)高低位做過$0.94/$0.093，平均走佬價為$0.0935，即平均輸兩格或2.1%。
依家10點正，恒指今朝早高開後，指數於正式開市時段就一直係咁飆，早早喺地鐵臨出閘時企埋一邊打個message比聊天室戰友可以爬佢好倉出第一注；再返到結界之後開機，無幾耐就見到恒指五分鐘圖高位出咗「碑墓十字星」，本以為諗住再睇定啲先，打住稿，打唔夠兩句再睇返個圖，一支「大陰燭」出現咗，SlowSTC(14,3)都見由超買水平高位回落；換條50分鐘線(五分鐘圖 X 10線)出嚟反而見到恒指at this moment踩緊條50分鐘線。
先唔理條恒指先(怕且佢都可能戀住條50分鐘線一陣)，依家10點6分，恒指做緊28857點，升115點，睇返今日恒指牛熊證街貨圖，兩邊都無新增街貨層，而牛熊中間位為(28900+28699)/2=28,799.5點，以現價計，恒指由噚日近牛證街貨彈高變成近熊證街貨，熊證最貼價層為28900至28999點，有相當於66張期指。的確，如果用兩邊首三層街貨做比較的話，點秤都係牛證街貨量比熊證街貨量多，奇怪點解下方有咁多街貨唔打，都要向上發展？日線圖有答案。
放大少少個日線圖就會見到，截至依家10點14分，恒指低位暫時做過28741點，幾日來恒指下方都係靠20天線同50天線做啦啦隊撐住，同以截至依家計，20天線(28757點)同50天線(28730點)仍然做緊啦啦隊，下方SlowSTC(14,3)雖然未見%K線升穿%D線，不過呢兩條線由5月底至6月初的嚴重超買水平下行至依家中軸位置，佢要喺呢個位向上反上去都無話唔得。
再睇返五分鐘圖，恒指一度失守50分鐘線，依家再沿住條線向上爬過，SlowSTC(14,3)雖然未見向上勢頭，但好歹%K線仍高走於%D線。
恒指牛(67650)，收回價28400點，同現價有逾400點差距，62倍槓桿夠DT用，所以11.87%都唔算多；你睇其他再高槓桿嘅都有over 20%街貨做比較你就明架啦。
唯一要小心嘅係小時圖依家頂住保歷加通道頂，但換天線就見有100小時線(小時圖 x 100線)支持住，換言之小時圖依家係被兩條線夾住，只可寄望SlowSTC(14,3)向上走嘅勢頭可以生生性性，繼續向上啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon【每日一股】：https://www.patreon.com/cbbcwar
秒投輪證教室：https://bit.ly/31HG6AN
