睇返噚日隻東京(09618)，染藍失敗後，本以為佢噚日個走勢都會頹落去，但落到10點零到就玩醒覺，斜度唔算好高，速度都唔算好快，但就係慢行咁上返去$280樓上，途中只係見SlowSTC(14,3)喺臨上半場完場之前落過去3X呢個位一下；換個小時圖去睇，其實又成日都好似無乜點認真企得返上去保歷加通道中軸以上水平，只係尾市有一下飆咗上去，但不消兩個回合又回過，可恨SlowSTC(14,3)尾市%K線叫做上咗%D線，但兩線勢頭都唔係呈上，呢下先煩；今鋪唯有信小時圖不破保歷加通道中軸，hold一hold隻京東熊(59169)過夜先，順便測試下自己啲黑氣到底有幾強。
今朝起身睇新聞，見到右下角loop住條日經都升百零點，未開市前如常同聊天室嘅戰友一齊睇牛熊街貨同噚日留落嚟嘅走勢圖，初步度定今朝開市嘅策略。見到恒指以噚日收市價計，點數已經踩住熊證第一層28400至28499點，都確係心知不妙，唯有U盤時再睇緊啲。結果，U盤出嚟京東玩逆市下行，開市後見指數係咁一直向上飆，(59169)有理無理走咗先，以開市首五分鐘走貨計，(59169)高低位做過$0.051/$0.05，平均沽貨價為$0.0505，對比噚日嘅平均買入價$0.046，呢鋪膽粗粗過夜平均賺幅為9.8%，真心唔算勁；無計，唯有安慰自己喺個市升200幾點時都仲有隻過夜熊保得住條命之餘仲有得執，仲想點？
依家10點3分，開Patreon發現佢終於都supoort繁體中文，希望藉此可以吸納更多睇繁體中文嘅訂閱用戶，對於我呢啲用繁體中文+廣東話嚟寫文嘅嚟講，絕對係一件好事。
Load到恒指五分鐘圖，見指數今朝以一支「大陽燭」隊上之後，於28600點樓上行橫，作勢似等下方50分鐘線(五分鐘圖 x 10線)上嚟接住指數。再去望小時圖，今朝都有同聊天室戰友講，小時圖喺今朝完咗U盤之後彈高上保歷加通道中軸以上水平，再加上恒指現價企咗入熊證街貨堆裡面，真係唔好心急出反手。
「咁依家可以做啲咩呀？」(一個我經常性喺聊天室被問到嘅問題)，進取嘅可以留意五分鐘圖上見50分鐘線上行接住指數之後，有無力可以支持住指數上行，換保歷加通道睇的話，暫時嚟講指通道口仍見有拓闊情況，而整條通道都係呈上，SlowSTC(14,3)雖然已經處於超買範圍，不過一旦指數keep住向上，而保歷加通道口又keep住拓闊/保持通道暢通的話，踩住50分鐘線再向上殺熊亦唔出奇。
噚晚有戰友提醒今個星期五(5月28日)係期結日，既然要進取，就用恒指牛(64784)，收回價28268點，同現價有近370點差距，槓桿高達73倍；安全嘅可考慮遠少少嘅恒指牛(63468)，收回價28150點，同現價有近500點差距，63倍槓桿都唔係講玩笑。
當然，再安全啲嘅就更係等五分鐘圖上嘅SlowSTC(14,3)回返落去超賣水平先至進場啦；行多一步做swing trade，喺等SlowSTC(14,3)由超買至超賣期間，恒指熊(54009)，收回價29100點，同現價有近500點差距，槓桿約38倍，嘗試爬格仔、來回trade呢種DT swing trade嘅玩法。
唔駛驚，唔習慣嘅可以用paper trade做住練習先；一係Join我patreon，都可以留message問問題；再唔係入嚟聊天室問我，總之就有問必答！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
秒投輪證教室：https://bit.ly/31HG6AN
