激氣！恒指今朝高開成200幾點開市！早知嘅話噚日隻Call(20112)唔駛走得咁冤枉啦！不過，高開過後恒指到9點半正式開市，真係回得好急，可能今日係星期二，林鄭行會見記者，講咩唔係重點，重點係林鄭同「秋官效應」一樣，一出嚟市就跌；或者林鄭比秋官更可怕，恒指率先跌定先。
依家9點56分，恒指升幅比今朝開市縮咗一半，做緊28434點，升95點。暫時喺聊天室都只係叫大家出淡倉，同步留意五分鐘圖50分鐘線(五分鐘圖 X 10線)追上嚟接住恒指，同埋SlowSTC(14,3)嘅走勢，一旦回到落去最近嘅天線而又發現跌唔穿嘅時侯，就係反手嘅時侯。
望望恒指牛熊證街貨圖，今朝開市報28552點呢一刻，so far做咗今日暫時高位，所以第一層熊證28400至28499點嗰58張期指已全數收回，變相28500至28599點先至係最貼價層，而呢一層係最多新增街貨層，順個便望埋兩邊街貨圖嘅分布，雖然牛證街貨比熊證街貨還要多(63.8：36.2)，不過，以最近五層計，唔用計數機都知道係熊證多貨啲；呀！ 介紹番，今日3月30日係期指結算+季度結算嘅大喜日子，不宜太淡。
依家10點17分，恒指五分鐘圖上一早見到指數沿住50分鐘線而上，同步開埋騰訊(00700)五分鐘圖比戰友觀賞一下佢條SlowSTC(14,3)喺一個幾咁低嘅水平，佢一彈，市就上；加埋林鄭講完嘢(唔好問我佢講咗啲乜，無心機聽)反手動作我估戰友們一早做咗，重新揀過一隻貼價啲嘅牛，再順便揀多隻騰訊牛比戰友參考。
依家10點31分，恒指踩住50分鐘線上行至28600點，即係話28500至28599點嘅熊證都已經全數死亡；想再追好倉嘅話，睇嚟都要等等條SlowSTC(14,3)回番落嚟，或者指數回返落50分線先至再出手就比較穩陣啲。
恒指牛(55252)，收回價27900點，同現價(10點35分@28582點)有近700點差距，逾50倍槓桿適合Day trade用，戰友們較早前都係用緊呢隻。
10點38分，恒指回緊，機會係比有準備嘅人，下round啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
