今朝早起身見日經升成200幾點,心諗:係咩?咁升得咩?再睇埋今日個牛熊證街貨圖,見下面一堆重牛坐鎮,唔殺到落27500至27599點呢啲位企穩,第二層27700至27799點重貨牛都實死無生,呢度儲咗成1258張期指,咁重貨又咁近,有乜可能會唔死?結果,佢喺我坐巴士返工時做完U盤之後就死咗。
依家9點55分,返到公司開咗部電視,斟埋杯茶,見到恒指跌幅收窄至跌175點,做緊27742點,五分鐘圖上由今朝低位慢慢爬返上去掂住條50分鐘線(五分鐘圖 x 10線)持倉過咗夜嘅呢啲位就唔好貪心,反正恒指開市後都殺咗首三層牛證街貨,夾埋有相當於2644張期指,基本上今日大戶都可以收工啦。
至於隻小米Put(21761),噚日最後嘅策略係沽一半,留一半,以依家日線圖見小米今日股價裂口下跌兼穿保歷加通道中軸,本來仲以為噚日自己好大貪,下望小米保歷加通道底部,但依家睇嚟都唔係咁過份啫,不過小米三連跌,唔貪心咁樣過兩日夜,就當今朝早開市首15分鐘進行收割的話,按當時(21761)高低位做過$0.34/$0.28,平均價$0.31,對比之前計落嘅$0.186,平均賺幅66.7%,唔駛等月底都已經可以幫自已做月結啦。
收割所有淡倉之後,依家10點11分,恒指跌幅已大為收窄,跌40點,報27877點,喺聊天室都叫定戰友追好倉DT,不過今日隨時反嚟反去。
DT係咁架啦,要好似煎魚咁唔可以成日反嚟反去嘅話,路過見到平保(02318)今日個市開市時急插,呢條友仔日線線昂仲可以企得穩條100天線($93.229),確係有啲計,再望埋條SlowSTC(14,3),%K線(12.58)低位作勢想升穿%D線(13.386)。
好啦,放你入watch list度先啦。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
MeWe/Patreon/FB/IG:輪證贏家
秒投聊天室:輪證教室