噚日隻恒指牛(60761)DT執咗9.8%；貪心鬼食唔飽於是走去睇騰訊(00700)，見噚日日線出咗「平底三角形」待爆；再留心埋見SlowSTC(14,3)，做咗兩個浪頂出嚟兼有作勢反彈賣勢，順個便煲定下個星期三(3月24日)騰訊業績，所以就揀定咗隻騰訊Call(18982)，再順多個便博恒指波幅指數(VHSI)低位回升的話，蓋恒指同騰訊日線圖都見利好訊號發出，就更加想出好倉博大波幅上行。
一如以往地等騰訊五分鐘SlowSTC(14,3)回落時先入市，最後等到3點35分至完場前，SlowSTC(14,3)落到超走水平，小注入(60761)，博一博，單車變摩托。
唔駛問，揸Call過夜嘅今朝更係想殺人啦！恒指低開，騰訊都唔慌有得升，不過，若然以前都有追開【輪證贏家】的話，都會知道呢啲時候就更加要氣定神閒，因為以前都有講過當大裂口上/落開市時，好多時喺開市後往往都會向住裂口出嘅方向順行多幾步，就好似田徑運動員咁，跑完100米之後唔係即刻可以停喺度，要比多幾10米佢哋將個步速減慢，由跑變快行再變慢行，最後先會停。
同一道理，反正個市不似如期咁向相反方向走，點解要喺佢跌到最火紅火綠嘅位沽隻Call？進一步再諗，當指數行得火紅火綠嘅時候，其實技術指標都會被搶高/低，當技術指標去到一個極端位置時就好大機會出現鐘擺(尤其是呢啲行得咁急嘅市)，佢一掉頭，就係飛雲到嘅時候。
當然唔係話次次都捱得到倒賺，都真係要睇市況，好似今日咁，騰訊隨大市低開完之後，喺五分鐘圖上的確見掉頭上行，但可惜去到50分鐘線(五分鐘圖 X 10線)就破唔到，過夜Call亦應該喺呢個時候走，按9點50分呢支五分鐘嘅燭高低位$0.305/$0.29計，平均走佬價$0.2975，對比噚日平均買入價$0.315，輸6.3%，算係咁啦。
輸，唔緊要，最緊要係識得輸！再聰明啲嘅，就係喺你要斬走隻Call時反手追淡倉，幫自已止血，第一個step斬Call純粹係我自已做；第二個Step開淡倉，今朝喺聊天室已經畫咗圖，講底晒Lu；「咁依家有咩做呀？」買六合彩囉！今晚開啦！1億1千萬呀！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
