熱門:

2019年5月24日 港股直擊 即巿股評

【輪證贏家】俾面14天RSI落到27樓下

有時啲人話「機會就只有一次」,呢句又真喎。噚日揀咗隻恒指熊(59644)出嚟,諗住追跌下殺27100至27199點嗰堆重牛啦,但全日就只有朝早10點55分至11點5分,恒指5分鐘圖SlowSTC(14,3)見到超買位,以當時(59644)高低位做過$0.109/$0.097,平均買入價價就係$0.103。

就係得呢一次入市靚位,如果噚日朝早入到嘅話就發啦,事關食完個飯返嚟之後個市就玩尋底,雖然未至於嗰位預言家話「中環會有七級地震」,但跌500點都應該震走咗唔少近牛;而噚日喺[下半part]度估,博反彈嘅極有可能將佢哋嘅防線再後下移,可能係27000至27099點,因為呢個水平係齊點數嘅大位;又或者係26900至26999點,事關萬一27000點有咩閃失,喺26900至246999點嗰堆牛仔仲有位同時間可以走人。

依家9點53分,恒指今朝無跟外圍再跌,開市升129點,報27396點;至依家升幅略為有少少擴大,至升159點,做緊27426點,應該係日線圖上SlowSTC(14,3)終於喺低位作出鐘擺反彈有關(呢個已經吼咗幾日,但早前有講過鑑於SlowSTC(14,3)係敏感度較高嘅技術指標,所以佢基本上係可以處於單位數時仍然超賣落去嘅);但同步開恒指5分鐘圖見,依家恒指現水平SlowSTC(14,3)已經見超買回落lu。

唔理個市住,睇咗牛熊證街貨圖先,一開就見到噚日最想食到嘅27100至27199點嗰堆最貼價牛證,今日一開果然走咗差不多四成,依家有518張期指;至於27000至27099點呢度,又真係變成咗重貨區喎,依家有相當於862張期指,而新增期指張數351張,同27100至27199點減少嘅期指張數325張又真係差唔多喎,咁咪咁啱大家都鼠晒落100點咁齊心先?

Anyway,再數落去由26900至26999點打落嗰四層,每層牛證都有逾500張期指喺度,你話對比起上方熊證第二貼價28100至28199點嗰1023張期指就當然唔吸引啦,但下方牛證又勝同現價近嘛。喺下個星期四(5月30日)就期指日之前,唔係有得食就好食啦咩?(都未必關事,「有得食就好食」應該係日日發生先啱)

最後睇埋恒指日線圖,今日10天線(27896點)終於都跌穿咗條250天線(27903點),又一個「死亡交叉」嘅出現,特別係同條250天線有關,心理壓力好似大啲;再加埋下方啲牛證咁鬼吸引,恒指熊(61626),收回價27947點,同現價有逾500點差距,槓桿比率約35.14倍,同一收回價之中最高;仲有,呢隻已經係最貼價嘅熊證啦,見到咁高槓桿,相信大家都估到係以短線為主啦,無計,即使有「死亡交叉」同重+近牛證街貨支持住,但14天RSI噚日落到27樓下,點都要俾個面彈少少嘅。

早兩日有講過,我家老爺生日,我同佢再同埋一位我哋嘅同事+朋友MK食飯;今日至MK先生生日啦,上年經歷咗咁多事,希望你以後嘅每一年都身體健康!無病無痛!快啲返加拿大同老婆退休養老!(喺嗰邊發咗達嘅話,唔好忘記我哋呀!)

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads