熱門:

2019年5月22日 港股直擊 即巿股評

【盤房來料】騰訊唔精神 大市仍頭痕

美國暫緩封殺華為,美國晶片股反彈,美股亦反彈,不過港股今早表現較反覆。恒指高開96點後,開市無耐曾幾乎抹去所有升幅,只係僅升8點,其後A股一度倒升,港股曾升171點,見過27828點半日高位,可惜反彈乏力,莫過話二萬八已無咗影,家下係連27800點都未企得穩。中午恒指報收22739點,升82點;國指則升12點,報收10647點。但係市況實在反覆難玩,缸邊友意興闌珊,離場唔玩,半日成交額只有426億元。

重磅股個別發展,大笨象(00005)跟平保(02318)分別升0.38%及0.29%,肩負支撐大市作用,而港交所(00388)半日亦升近2%,友邦(01299)跟內銀股亦做好。可惜火車頭騰訊(00700)唔爭氣,早段上過342.6元半日高位,但340元企唔穩,又再反覆回落,半日跌0.8%。騰訊唔精神,個市都好頭痕,想反彈亦有心無力。

美國晶片股反彈,呢邊嘅5G跟手機設備股亦反彈,中興(00763)彈力最強,半日升逾5%,其他相關股份升1.5%至4%不等。除咗5G及手設股,晶片股及軟件股亦乘機炒上,之前業績不俗嘅金山軟件(03888)半日升2.6%,金蝶國際(00268)升逾5%;華虹半導體(01347)及中芯(00981)齊齊升逾7%。

習大大巡視完江西稀土企業,噚日中國稀土(00769)落鑊狂炒喪升逾倍,阿Man已千叮萬囑唔好高追,今朝獲利盤湧現,上半場曾跌逾三成,低見0.52元,不過之後跌幅收窄,跌幅減半,但半日仍要跌超過一成半。雖然中國一直主導全球稀土市場,市佔率高達七成,但澳洲跟越南等地嘅稀土蘊含量亦唔少,一旦中國真係禁止稀土出口,亦唔係無辦法填補缺口。所以呢,炒中國稀土都可能好短癮,若然咁不幸高位追咗貨,都要睇位走人。

港股短期仍處於弱勢,只要有一個半個利淡消息,恒指仍有機會下試27200至27400尋找支持,而上面阻力係27800至28000,短線大市仍然反覆,呢啲市況都係做觀眾穩陣。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。