特朗普掀貿易戰，缸邊友都係望住相關消息做人，暫時貿易戰發展如何屬未知數，不過今日稍後時間會有意大利大選結果，一旦疑歐派勝出，歐羅跟歐洲股市又面對新一輪沽壓。歐洲股市都算陰功，米字旗國脫歐談判難關重重，德國政治不明朗因素困擾幾個月，噚日先叫做成功籌組聯合政府，依家又輪到意大利可能陷入亂局。至於花旗國內對開徵關稅意見不一，有人贊成，有人反對，呢單嘢仍存在好多變數，令各地股市喺3月內繼續反覆。
恒指今早低開59點，開市後曾升96點，見30679點半日高，不過30600未企穩又急插，最多跌532點，低見30051點，逼近三萬點關口，亦係100日線(29999)所在，半日收市前跌幅收窄。恒指中午收報30238點，跌344點；國企指數報12097點，跌106點。
全國人大會議今日開幕，A股先高後低，市場擔心去槓杆加大力度，內銀股跟內險股捱沽，亦係拖累港股由30600點水平急跌原因。重磅股普遍腳軟，騰訊(00700)跟港交所(00388)分別跌0.6%及1.2%；大笨象(00005)自業績公布後一沉不起，今日更跌穿上個月低位，76元係短線支持，呢個位失守，阿Man無眼睇。
至於內銀及內險股維持弱勢，反而內房股逆市做好，因政府工作報告表示，熱點城市房價漲勢已得到控制，暫時已無需要加大調控力度，內房股逆市上升。中海外(00688)升0.7%；華潤置地(01109)升2%。二線股領前，合生創展(00754)升5.9%；世房(00813)升2.2%；新城發展(01030)升1.6%；龍光(03380)升1.7%；旭輝(00884)升1.4%。不過阿Man認為內房股只係反彈，維持今年內房股難復去年勇嘅睇法，有貨應考慮趁反彈減磅，而唔係見亂市上升盲目追貨。
恒指公司季檢今日生效，但新貴個別發展，好似騰訊雖然被納入國指，但股價暫未見起色，石藥(01093)及眾安(06060)更分別跌2.1%及3.2%。至於新高教集團(02001)跟遠大醫藥(00512)獲納入「港股通」，前者表現較佳，後者高位有回吐，有貨可考慮食糊套利。
預期大市繼續反覆，市場信心未穩，稍為負面消息或被放大，目前希望大市能守住100日線，否則大有機會再下試上月低位。大市若守100日線，仍需重上30600至30700水平企穩，要扭轉目前弱勢回勇，大市定必要升破31800水平，否則3月大市都係有波幅，冇升幅，暫時難寄予厚望。至港滙疲弱及拆息去向需注意，一旦拆息上升，提防有資金流出。
麥狄文
(徐狄怡‧證監會持牌人)
