嚟到雞年最後一個交易日，今日半日市，【盤房來料】提早同大家放料，阿Man亦提早同大家拜年，祝大家狗年事事順利，身體健康，心想事成，股運亨通，買大開大，買細開細。噚日港股午後偷步，恒指午後一度急升近800點，高見30637點，逼近50日線(29657)，收市報30515點，升676點；國指則升256點，報收12260點，不過成交額縮水至1106億元，挾淡倉意味濃厚。
美股玩過山車玩到上癮，隔晚雖然唔玩瘋狂嗰隻，但都玩咗一次小型過山車，公布通脹數據後，市場擔心加息步伐加快，道指早段曾挫遇百點，不過大戶如何演繹數據才最重要，結果美股三扒兩撥三大指數已收復失地，即使10年期債息仍高企2.91厘，但美股不僅收復失地，更連升第四個交易日，三大指數升逾1%，反映市場已消化加息。
夜期同樣波動，受美股早段下跌拖累，夜期一度跌穿三萬關，但隨住美股回升，夜期一度高見30523點，報收30383點，而ADR則爆升410點，按比例計算，恒指報收30926點，而港股亦高開30958點，唔少熊寶寶未開市已被回收，雖然熊證街貨有限，但大戶要挾倉，連些少熊寶寶都唔放過，汁到撈埋。既然一開市已屠熊，現水平再挾高誘因已失，估計喺31000點之前，恒指要先企穩50日線再打打底，過年後方有條件再向上回補另一個巨型下跌裂口31600至31700點。
今日估計裂口高開後，再難有好大變化，可能就喺二百點之內上落，30800至31000，熊仔殺得七七八八，挾上誘因欠奉，若然假期後要再升，殺落去俾機會買平貨機會更低，半日市買賣兩閒，或者就喺現水平窄幅浮動。今日年三十晚，有撈貨放心坐，吉倉寧願過年後買貴唔買錯，不如收爐熄機唔睇市，準備今晚團年飯，祝大家團團圓圓，狗年再戰，祝大家戰無不勝，騎住牛牛過狗年。
麥狄文
(徐狄怡‧證監會持牌人)
