隔晚聯儲局議息,一如預期維持利率不變,而鮑爺無再放鷹,只不過佢老人家強調咗「目前完全沒考慮降息」,此等言論表面睇就當然未有放鴿,但目前唔減息,唔等於之後唔會減,只係要繼續壓抑通脹,鮑爺當然唔會咁輕易放鴿,繼續用把口嚟帶住風向先。雖然唔減息住,但利率期貨顯示,12月加息機會進一步下降,美股三大指數上升,道指升221點,標指跟納指分別升44點及210點,息口敏感股造好。港股隔晚喺ADR及夜期靠穩,今早隨外圍造好,一度升逾300點,成功突破10天線(17192),但可惜又係到咗20天線(17444)掉頭。
恒指高開180點,早段曾升357點,見17459半日高位,但廿天線未能企穩掉頭,升幅一度收窄至153點,見17255半日低位。中午恒指收報17307,升206點;國指升80點,報5939;恒科指則升85點,收3837。半日成交額414.9億元,較上日半場略增,但以升幅計算,呢個成交額仍未能配合升勢,反映市場入市意欲仍不大。
大型科網股普遍向上,只有美團(03690)廝人獨憔悴,半日跌0.5%;攜程(09961)靠穩,京東(09618)跟阿里(09988)半日分別升1.6%及2.2%,阻看今年「雙11」購物節銷售情況有否改善。騰訊(00700)半日升1.1%,百度(09888)升近2%,網易(09999)則升不足1%。
金融股個別發展,友邦(01299)跟平保(02318)半日升逾2%;藍籌內銀股升幅由不足1%至1.8%不等。港交所(00388)升1.4%,可惜仍未重返280元水平。不過大笨象(00005)半日跌0.2%。
汽車股陸續公布上月交付數據,車股發力,電動車三傻表現唔錯,小鵬(09868)半日升8.3%,蔚來(09866)跟理想(02015)升逾4%。傳統汽車股方面,吉利(00175)升近5%,長汽(02333)升5%,比亞迪(01211)亦升0.3%。美國暫時唔再加息,息率或有望見頂,地產股今日造好,領展(00823)半日升6.2%,藍籌之中表現最好,其他本地地產股,升幅由超過1%至4%不等。
聯儲局已連續兩次議息按兵不動,只要通脹繼續受控,估計下月議息亦唔會加息,息口有望見頂,但要息率回落,至少都要等到明年下半年,高息將維持一段時間。至於港股喺淡友連勝十個月後,好友要部署反擊,僅剩餘兩個月時間,雖然大局已定,但好友都唔好輸得太難睇,全年計能夠輸少啲,咁都叫有返啲尊嚴。不過好友要真係重拾尊嚴,至少都要企返條50天線,大約係17800水平上面,先有本事同淡友拗手瓜,否則就算淡友收夠籌,唔再狂踩港股落去破底,都只能夠喺17000至17800之間窄幅徘徊。
麥狄文
(徐狄怡‧證監會持牌人)