熱門:

2023年4月19日 即巿股評 港股直擊

【盤房來料】資金遺棄港股 美股更值博逢低吸納

隔晚美股繼續反覆,但因為金管局再承接港元沽盤,港滙持續走弱,再度觸及弱方保證,令港股昨日回吐131點後,今日繼續走軟,不過10天線(20457)失而復得,但大市半日成交額竟不足500億元,可見缸邊友實在無心戀戰。

恒指低開17點,20633已經係半日高位,低開低走,其後跌幅擴大至255點,見20394半日低位,但50天線(20302)有支持,守得住50天線跌幅略為收窄,重返10天線之上。半日恒指收20549,跌100點;國指跌48點;恒科指跌44點,報4164。半日成交額496.28億元,少得有啲恐怖。

藍籌股個別發展,大笨象(00005)半日跌0.4%;友邦(01299)就算係咁,總算企定住85元。ATMJ只有美團(03690)逆市升1.3%,騰訊(00700)、阿里(09988)齊齊跌0.7%,京東(09618)則跌1.4%。藍籌之中以中芯國際(00981)表現最好,半日升4.6%,主要都係跟返美股嘅晶片股上升。

另外,金沙中國(01928)跟銀娛(00027)同樣係逆市上升藍籌股,由於五一黃金周接近,市場開始憧憬黃金周澳門人流暢旺,資金流入濠賭股,除咗金沙跟銀娛分別升2%及3.8%之外,其他濠賭股全線向上,升幅普遍超過1%。另外金價持續強勢,支持資源價格高企,資源股今日逆市造好,不過現水平再追入,上望空間大減,都係得個睇字。

港股成交縮水到咁,可見目前係買賣兩閒,之前阿Man都講過,二萬樓上追貨值博率有限,可恨嘅係,之前大市落到19000水平,亦未見大量資金流入趁低吸納,港股明顯被遺棄,進入唔生唔死階段,一日解決唔到缺水問題,港股真係無得搞。反而美股多次見到資金逢低收集,倒不如加大注意力去睇美股,勝算將比只看顧港股更高。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。