隔晚美國公布CPI合乎市場預期，加上發生SVB（矽谷銀行）事件後，市場已預估下星期聯儲局議息唔會加0.5%咁進取，甚至有三成預測係暫緩加息。中小型銀行嘅擠提開始冷卻，市場暫時消化SVB倒閉事件，而SVB得到保障存款基金幫助，增強流動性，加上開始出售資產，問題料可順利解決。美股因此急彈，三大指數回升，港股喺夜期跟ADR亦造好，不過今早港股一度升近500點，但中午收市升幅減半，目前明顯受制250天線(19867)，更莫講話要向上試條10天線(19986)。
恒指高開275點，升幅一度擴大至497點，見19745半日高位，但250天線影都未見已回頭，半日升幅削半。恒指中午收報19490，升242點；國指報6542，升103點；恒科指半日收3861，跌71點。半日成交額只有602.58億元。
藍籌股都唔係全部回升，好似噚日急跌嘅友邦(01299)，今日就繼續走弱，高開82.6元即低走，半日更失守80元，表現較差。大笨象(00005)回升2.2%，收購SVB UK後或需向其注資190億港元，市場擔心注資或令派息減少，噚日股價急回，今日反彈亦無法企穩55元。
債息回落有利科網股，科網股全線回升，騰訊(00700)半日升1.8%；美團(03690)升不足2%，股價暫時受制130元阻力；京東(09618)亦受制160元阻力，升逾1%；阿里(09988)跟杭州監管機構簽署合作協議，升2.3%，ATMJ之中表現最好。百度(09888)半日升近5%，表現強勁，不過要重上140元似稍有難度。至於聯通(00762)半日跌2.8%，藍籌之中表現最差。
內房股今日反彈，主要係內地首兩個月住宅銷售按年回升3.5%，阿Man一直都話內房股要救得返，就要賣到樓，暫時住宅銷售叫有返啲起色，內房股反彈亦正常。不過內房股反彈都唔會引唔起阿Man興趣，復牌後連跌幾日嘅佳兆業(01638)終見反彈16.9%，不過上面蟹貨多到嚇死人，反彈過後隨時又打回原形。其他內房股半日全線反彈，升幅由超過1%至16%不等。
醫藥股表現唔錯，生科股亦造好，同仁堂科技(01666)炒高6.8%；同仁堂國藥(03613)急揚5.2%；中國中藥(00570)與白雲山(00874)各升3.6%；神威藥業(02877)漲3.2%；康臣葯業(01681)升2.4%。信達生物(01801)半日急升近一成，按聯交所股權變動紀錄，禮來亞洲基金(LAV)於3月8日增持35萬股，每股平均價39.9972元，最新持股比重為5.02%，持股量增至5%以上，以後呢個基金有乜嘢變動都無所遁形。其他生科股表現亦唔差，之前阿Man有建議低吸嘅康方生物(09926)，半日亦升半成。
港股再一次無法收復250天線，一旦再失守多一次100天線(19336)，下破19000水平機會極大，下一個支持位要去到18500至18600，港股喺缺乏成交支持下，反彈有心而力不足，睇嚟繼續係有波幅、無升幅，甚至步入級級向下更弱之勢。
麥狄文
(徐狄怡‧證監會持牌人)
