美股隔晚表現反覆，美國最新公布嘅零售數據表現強勁，反映美國即使唔少大型企業裁員，消費市場仍未受影響。美國1月整體零售按月升3%，遠超預期的升1.8%，係23個月來最大升幅，呢個數字出咗之後，美股早段下跌，主要係市場認為喺強勁嘅消費市道下，通脹雖見頂但未肯大幅回落，FOMC仍有條件加息。只不過美國就業市場，未見因為大企業裁員而轉差，除咗係美國仍有大量就業職位等緊人去開工之外，能源價格從去年高位回落，亦減少咗美國人嘅財務壓力，暫時未見美國人因為失業而導致破產個案大增，民眾目前仍願意花費，消費市道仍然理想。經濟數據反映美國今年陷入衰退機會較低，喺目前美股市場資金仍然充裕下，即使今年息口前景令美股反覆，但目前仍然喺接近高位徘徊。美股隔晚亦由跌轉升。
至於港股，連跌四個交易日後，今日終見反彈，北水呢幾日亦有助攻，開始肯積極少少買貨，連續錄得淨流入，港股今日亦有個似樣啲嘅反彈，半日升逾400點，重上二萬一水平，並成功收復10天線。恒指朝早高開134點，升幅一度收窄至75點，見20887半日低位，但A股造好兼北水積極買貨，帶動大市回勇，愈升愈有，半日最多升481點，見21293半日高位。恒指中午收報21292，升479點；國指升187點，報7205；恒科指勁升4.1%，升178點，收4467。半日成交額639.76億元，呢兩日成交由低位回升，雖未見太大增長，但總好過持續萎縮。
藍籌股普遍回升，金融股表現強勁，友邦(01299)、港交所(00388)、國壽(02628)齊齊升逾2%；平保(02318)半日更升3.2%；內銀股錄得1%左右升幅；大笨象(00005)則升0.7%。噚日急回嘅安踏(02020)，盤中跌幅收窄，以一條長下影線收市，反彈1.4%，但仍未完全回補下跌裂口。至於比亞迪(01211)，半日亦升1.1%，但吉利(00175)本身處於近日低位，亦接近短線支持，半日反彈力較比亞迪好，彈咗2.7%。
要數今日推動大市反彈嘅功臣，當然係科網股最突出，ATMJ全線向上，當中以京東(09618)半日彈7.5%最勁，亦係升幅最大藍籌股；騰訊(00700)跟美團(03690)半日升逾3%，阿里(09988)半日亦錄得近4%升幅。其他科網股全線向上，升幅1%至7%不等。內房物管股日升日跌，噚日回咗今日又跟市升，已印證之前阿Man所講，呢兩個板塊將會一段日子有波幅，冇升幅。另外，中資電訊股今日表現亦強勁，三股齊齊升至52周新高。
大市由22700回落至20800水平，跌咗1900點，調整完成與否，就要睇收復10天線後能否企穩，而20天線21640係下一個關鍵位，若然升至該水平再度掉頭，10天線得而復失嘅話，咁調整仍要持續，向下補20200裂口，甚至考驗250天線嘅機會仍存在。
麥狄文
(徐狄怡‧證監會持牌人)
