美股喺公布CPI前一個交易日造好，三大指數升逾1%，市場觀望今晚嘅公布，以推測嚟緊聯儲局嘅息口路徑，令港股半日唔上唔落，好淡爭持，恒指波幅不足200點，目前喺21200水平拉鋸，半日成交額更不足500億元。
恒指今早高開71點，最多升72點，見21237半日高位，但欠缺成交配合下，大市由升轉跌，半日最多跌89點，見21074低位，不過21000水平暫時守得幾穩，喺21200水平淨持。恒指半日收報21211，升46點；國指報7156，升11點；恒科指跌10點，收4364。半日成交額只有484.41億元，買賣兩閒，喺美國公布CPI前，缸邊友未敢輕舉妄動。
藍籌股個別發展，ATMJ只有美團(03690)半日升0.4%，騰訊(00700)跟阿里(09988)跌不足1%；京東(09618)半日則跌1.6%，但ATMJ暫時都守住短線支持，表現尚算硬淨。金融股今日表現唔錯，友邦(01299)、大笨象(00005)半日分別升0.9%及0.4%，撐住指數，內銀跟內險股亦見上升。港交所(00388)半日升0.7%，噚日守咗330元支持位，半日再升0.7%。
生科股今日跑輸大市，藥明生物(02269)雖然發盈喜，預期去年盈利增加三成，但股價半日反跌4.1%，藍籌之中表現最差，說明依家係好消息出貨，就算有好消息，市場亦唔賣賬；同系藥明康德(02359)亦跌1.1%。其他生科股半日跌超過3%比比皆是，而阿Man睇好嘅信達生物(01801)半日跌不足1%，表現算係硬淨。
電力股今日亦跑贏大市，同樣係好消息，龍源電力(00916)發電量增加超過30%，但未見好消息出貨，股價半日錄得6%升幅，帶動整個板塊上升。電力股變成今日焦點，唔單止綠能股造好，火電股一樣有追捧，板塊內股份升幅由超過0.5%至5%不等。
物管股跟內房股反彈，萬象生活(01209)半日升4.5%，成為藍籌升幅冠軍，其他物管股半日普遍錄得超過1%升幅。不過阿Man對呢兩個板塊暫時興趣不大，之前都講過，呢兩個板塊尚有待解決債務問題，短期只會有波幅，冇升幅。
暫時大市仍處於調整浪之中，雖然噚日回補20800裂口後回升，但成交未見配合，而10天線(21462)已跌穿20天線(21711)，短線調整持續，仍有機會回補1月4日20200嘅上升裂口，即係大市仍有考驗50天線(20561)及250天線(20124)嘅機會。
麥狄文
(徐狄怡‧證監會持牌人)
