隔晚美國公布10月CPI數據低過市場預期，市場憧憬聯儲局將減慢加息步伐，甚至明年第三季後有機會減息，美國10年期債息回落至3.8%，美股三大指數急升，帶動夜期跟ADR隔晚爆升。港股喺過去三日調整逾500點後，今早裂口高開，一步達陣上到萬七關，不過暫時萬七關有爭持，尚未企穩。
恒指高開1039點，見17120，已經係半日高位，創一個月高位，不過50日線(17260)阻力唔細，未能一舉突破又要抖抖，半日升幅曾收窄至747點，見16829半日低位，但食糊盤收歛下，中午恒指亦能升881點，報16962；國指升303點，報收5720；恒科指升207點，半日報收3379。半日成交額863.96億元，留意今日係MSCI rebalancing，成交額會大啲嘅，以今日咁嘅升幅，若然收市有1500億以上，咁都算夠上升動力，配合到升勢。
藍籌股全線向上，神華(01088)無起跌都要包尾，由於美債息回落，對息口敏感嘅本地地產股全部做好，平均升幅有半成以上。友邦(01299)半日升6.7%，成功重返70元水平之上，之前阿Man都有提示，作為長線投資，65元水平嘅友邦有一定吸引力，可以買嚟長線投資，如今重返70元水平之上，總算守得雲開。今日有唔少藍籌股升幅超過一成，以美國市場為主嘅創科(00669)，仲有申洲(02313)半日都升逾一成，至少李寧(02331)裂口高開近一成半後，半日升幅收窄至6.3%。平保(02318)跟招行(03968)半日則錄得近一成升幅。
中概股終於跟返美股勁彈，重磅科技股全線向上，ATMJ以京東(09618)彈一成最勁，美團(03690)升近一成，騰訊(00700)跟阿里巴巴(09988)分別升7.3%及7.2%。其他科技股閒閒地升半成以上，快手(01024)半日更升13.4%。通脹有望見頂回落，加息步伐可放緩，除咗科技股沽壓可消除，對未有盈利，或需要透過融資去擴展業務嘅醫藥生科股亦有利，呢個板塊今日亦有不俗進帳，升幅由超過一成至接近兩成不等。
自阿爺提出以2500億元基金救內房後，內房跟物管股走出陰霾，今日碧桂園(02007)更爆升25%，成表現最好藍籌股，其他地產股至少升一兩成，剛發生違約嘅旭輝(00884)半日更急升36%，內房股之中升幅最多，旗下旭輝永升(01995)亦升近兩成。
呢兩日阿Man一直強調只要20日線未失守，由14600低位展開嘅反彈浪尚未結束，果然喺噚日大市回調至接近20日線，萬六關失而復得下，今日港股再度急升，上得嚟17000呢個位，下一個位自然係挑戰50日線17260，若然能企穩250日線，下一目標係18000大關。
麥狄文
(徐狄怡‧證監會持牌人)
