隔晚美國6月份CPI驚見9.1%,再創逾40年新高,雖然華府早已放風,6月個CPI會好嚇人,而市場見到出嚟個數字,反應較上月公布CPI時冷靜,不過市場預期今個月加息0.75厘無走雞,更有預測要有效控制通脹,加息幅度可能要去到1厘。美股就表現反覆,三大指數下跌,但相對上次公布CPI,今次跌幅算係溫和。至於港股,今早未有跟隨美股下跌,皆因內地股市今日頂得住,創業板指數更升3%,令港股得以靠穩。
恒指今早高開20點,報20818,其後回軟跌76點,見20721半日低位,但A股造好,加上創業板走高,帶動科網股有資金流入,港股止跌回升,半日最多升90點,見20888,可惜跟50天線(21035)仍有段距離,港股表現繼續反覆,喺20800水平附近上落。恒指中午收報20848,升50點;國指收7162,升16點;恒科指則升78點,報4625。半日成交額只有549.38億元,缸邊友厭倦日升日跌嘅不明朗市況,成交縮減。
藍籌股個別發展,今日科網股明顯頂住大市,ATMJ四大科網重磅股全部上升,騰訊(00700)升0.1%最唔爭氣,喺南非大股東表明要減持嘅陰霾下,好難有運行。至於阿里(09988)、美團(03690)跟京東(09618)半日分別升2.3%、2.6%及3.6%,四股合力撐住個市。
相反今早內房股物管股沽壓嚴重,內地爆發斷供潮,市場擔心內房債務問題再度惡化,早段唔少內房股跌幅都超過半成。至中午左右,內地有消息指近期多地爛尾樓業主集體「停貸」風波引起廣泛關注。下半年若要保持房地產行業持續復甦,並擺脫當前困境,建議調整「三條紅線」政策,同時成立規模達萬億元人民幣的「地產行業健康發展穩定基金」,由政府財政出資1000億,再從金融機構募資9000億。呢個消息令內房股低位反彈,跌幅收窄,其中碧桂園(02007) 附屬計劃購入集團境內公司債券,跌幅收窄至0.8%。不過其他內房股閒閒地跌2%或以上,睇嚟阿爺要認真考慮搞個保障基金救救內房股。
要救內房股又係要推啲內銀出嚟幫手,而停貸風波已開始威脅到內銀股,今日內銀股顯著走弱,招行(03968)盤中一度跌8.2%,跌穿今年低位,半日跌幅縮至4.5%;郵儲行(01658)挫4.5%,交行(03328)跌1.9%,信行(00998)跌2.1%,農行(01288)降1.5%,工行(01398)下滑1.7%,建行(00939)下滑1%,中行(03988)降1.4%。內房問題一日未解決,內地經濟亦受到威脅,阿Man相信阿爺必定高度重視呢個問題,只不過目前市場對內房物管呢個板塊信心疲弱,即使被視為行業整合後嘅生還者,一樣要捱沽,睇嚟暫時要先觀察,未有貨就唔好多手。
麥狄文
(徐狄怡‧證監會持牌人)