隔晚美股個別發展，經過之前兩個交易日急跌後，喺現水平喘定，市場等緊聯儲局議息結果，除咗預咗加息之外，議息內容比較緊要，市場睇緊喺通脹高企下，聯儲局取態會否更加鷹，嚟緊收水步伐會唔會加快。內地公布「三頭馬車」數據勝預期，其中工業增加值轉跌為升，中港股市造好。
恒指高開42點報21111，已經係半日低位，內地數據公布後，大市升幅擴大，成功收復20天線(21017)及50天線(約20935)，最多升325點，見21393半日高位，但仍受制10天線(約21475)。其後升勢略為回順，半日恒指升299點，報21367；國指升148點，報7481；恒科指升118點，報4713。半日成交額774.78億元，以目前重磅股喺呢啲價位嚟講，呢個成交額升咗300點，都唔可以叫成交配合升勢。
藍籌股普遍造好，今日較為養眼係啲內險股，中國平安(02318)首5個月保費收入微升，半日收市炒高7.4%，為升幅最大藍籌；國壽(02628)彈升5.8%，其他內險股閒閒地升3%以上。ATMJ亦全線向上，呢期最落後都係騰訊(00700)，遲遲都上唔返400水平，半日升不足1%；阿里(09988)跟京東(09618)半日升逾4%，應該係炒618購物節消息。
教育股未炒完，今日整個板塊繼續抽升，最誇張係新東方系，新東方在線(01797)噚日逾3.6億元北水淨買，中午再狂升31.5%，其母新東方(09901)則爆升34.1%；其他教育股至少升6%或以上。物管股今日終於識得行，喺今次大市由20000邊反彈至22000呢個反彈浪之中，物管股一直落後，恒指見咗22000回落先炒到呢個板塊，大市仲可以行到去邊，阿Man暫時都係較為保守，恒指唔上返10天線，都係區間上落，22000好難有咩突破。
今年過咗接近半年，都無乜IPO夠睇頭，阿Man都好少留意新股，直至噚日開始招股至星期五中午截飛嘅GOGOX快狗打車控股有限公司，終於令阿Man提起興趣去望望啲招股文件。大家對GOGOX呢個名字應該唔會陌生，甚至唔少人都用過GOGOVAN嘅服務，佢亦係第一間喺香港起家，由start up發展到上市嘅獨角獸物流公司。今次GOGOX計劃發售合共3120萬股股份(視乎超額配售權行使與否而定)，發售價為每股21.5港元，將於6月24日掛牌。
先睇睇GOGOX嘅本地業務，作為香港最大嘅物流平台，生意規模都贏對手幾條街，按2021年交易總額計，香港市佔率達50.9%，至於亞軍市佔率只有18.5%。GOGOX業務覆蓋亞洲五個國家及地區(即中國內地、香港、新加坡、韓國及印度)共340多個城市，而於海外業務同內地業務嘅分布竟然係五五波。以香港為首嘅海外業務，2021年收入大約3.17億人仔，同期內地業務收入大約3.44億人仔，兩者叮噹碼頭。相比起近飽和嘅中國市場，東南亞海外市場更具發展潛力。
不過做得Start up都預咗要輸錢，雖然過去三年都仲未有錢賺，2018年輸10.71億人仔、2019年收窄至1.84億、到2020和2021年分別擴大至6.58億及8.73億，但值得安慰係毛利由2020年的1.83億人仔升到2021年2.42億人仔，毛利率亦由34.6%上升至36.6%，每年燒嘅錢就愈嚟愈少。
GOGOX另一個賣點係股東名單猛人雲集，泊住咁多個大孖沙，當然係睇好其發展前景。睇返股權分布，大股東係騰訊系嘅58到家，持股47.95%；至於阿里同淘寶亦揸14.97%。單係計騰訊同阿里呢兩大科技體系，加埋持股62.92%，至於真正屬於香港創辦人嘅股份，佔16.69%。其他猛料股東仲包括建行、農行、交銀資產管理同埋瑞銀等等。
睇到呢度，當然會問抽唔抽得過，阿Man就唔畀意見喇，只可以講GOGOX係今年少數較受注目嘅IPO，仲係真正香港出品，正所謂唔買都要睇吓，唔想抽新股咪等佢上咗市，再睇睇股價走勢決定入唔入場囉。
麥狄文
(徐狄怡‧證監會持牌人)
