隔晚美股三大指數早段顯著下跌，道指更曾跌逾500點，但之後轉跌為升，標指跟納指跌幅亦見收窄。美股持續反覆，更有唔少日子都係單日轉向，大上大落，呢啲都係熊市特色，不過唔少中至大型股，經過一輪調整後，估值已跌至合理水平，加上基金現金水平偏高，睇嚟有部份投資者已開始趁低吸納，美股可能亦離底部漸近。下月聯儲局開始縮表，若然屆時資金流動性未見受影響，美股有機會見底整固，逐步回升。但暫時仍要留意美債息及美匯走勢，偏強嘅美匯指數，始終不利股市；而10年期美債息回落至3厘樓下，但係咪已見頂回落，暫時言之尚早。
至於港股呢邊，繼續維持日升日跌嘅上落格局，今早恒指略為高開後，曾升173點，見20286半日高位，但人民幣離岸價又再走弱，港股轉升為跌，曾倒跌44點，見20067，20000關有不俗支持，其後升勢回復，半日重上10天線(20213)。恒指半日收報20240，升128點；國指收6920，升37點；恒科指4000大關失而復得，半日升27點，報4059。不過，半日成交額只有532.97億元，買貨嘅意欲固然係低，但沽壓亦唔重，可能大部份人都係保持較高現金水平，無貨可沽。
藍籌股表現好壞參半，早兩日係威係勢嘅友邦(01299)，80元始終有一定阻力，企唔住回吐，今日跌0.1%，跌幅唔算大。聯想(00992)半日跌2%，藍籌之中表現最差。相反中移動(00941)今日除淨再升1.6%，股東財息兼收。本地銀行股跑出，早段大市搖搖欲墜時，全靠大笨象(00005)一股當關，守護指數，半日大笨象升3.4%，多得公司喺港英兩市回購股份。其他本地銀行股全線上升，所以話呢，美債息升，本地銀行股未必升；美債息跌，亦唔代表對本地銀行股不利。
科網股各自發展，阿里巴巴(09988)跟百度(09888)明日派成績表，半日腳軟，分別跌1%及1.7%，相反早段下跌嘅騰訊(00700)跟美團(03690)扭轉跌勢，半日倒升0.4%及1%，小米(01810)半日亦升0.7%，但京東(09618)半日跌近1%。其他科網股個別發展，快手(01024)每日活躍戶創新高，半日升4.2%表現較突出。
資源股普遍造好，煤炭股維持強勢，龍頭兗礦(01171)半日升逾半成，神華(01088)跟中煤(01898)半日升逾2%。奇怪係金價回軟，但金礦股亦隨其他資源股向上，不過反彈已逼近阻力位，追貨無謂。汽車股強勢持續，其中被視為最受惠汽車國策嘅長城汽車(02333)半日升逾7%，相對半日升不足3%嘅吉利(00175)顯得落後，暫受制100天線，如能突破，或有機會向16元挑戰。
麥狄文
(徐狄怡‧證監會持牌人)
