終於，喺噚日嚴重紀律之下，喺噚日2點前已經見到小時圖上破咗條10小時線，量度返10小時線嘅位置同五分鐘圖做比較，準確時間大約係1點10分已經上破咗，觸及咗恒指Put(27294)嘅止蝕水平，由呢個時間On top加多15分鐘作為走貨離場，即以(27294)喺1點10分至1點25點計高低位0.246元/0.236元，平均走佬價為0.241元，對比返之前嘅平均買入價0.206元，平均賺幅都仲有16.99%，都好，唔入肉就得架啦。
呻笨嘅應該係今朝返嚟見到恒指低開300幾點之後，甫開市旋即再向下跌多200幾點，截至9點43分止，指數最低見過20047點，跌逾500點，完全將3月17日個大型上升裂口補晒，一滴都無剩，我唔會想睇隻(27294)輪價做緊乜，睇嚟做乜？作戰室大家齊齊收割隻長Put最開心。
依家9點51分，指數大裂口低開之後，其實都喺20000至20100點之間徘徊，話就話恒指跌500幾點好大數點，但喺牛熊證街貨圖上，只係殺咗第一層嘅牛證街貨20100至20199點，呢度有相當於875張期指，重貨區之餘係最多新增街貨層。而再落多層嘅20000至20099點，以暫時低位計，雖然未死得晒，但都死咗七七八八，呢層其實係第二重貨區，有相當於869張期指。而本身指數算是企喺牛熊街貨中間位置，如今一下子向下殺落去，指數又變返好似2月底、3月中時咁：同熊證距離好遠，每日就不停地踩入牛證街貨範圍。
嚟到9點59分，指數喺五分鐘圖上見仍然指數喺底位橫行中，雖然指數有曾抽升過至跌幅少於500點，但走勢上仍然偏向橫行狀況，搵位進行即市操作似乎有啲難度。
唔知係咪因為個裂口已經補咗，完成任務嘅同時又好似無咗方向咁，走勢仍然都係偏看淡，皆因指數同牛熊證街貨擺放位置，就等會唔會見到有位再摺隻淡倉出場，例如喺五分鐘圖上見到50分鐘線(五分鐘圖10線)回落到指數附近時做咗阻力，再推低指數咁啦；安全嘅用返Swing Trade嘅方法，即Slow STC(14,3)上返超買時再出亦得。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
