雖然美債息仍然高企，但美股喺超賣下，隔晚出現技術性反彈，三個主要指數升幅均超過1%，帶動港股今日喺內地股市偏軟下，先跌後回升。恒指今早低開54點，其後倒升75點，於21000水平好淡爭持，半日最多跌88點，見20939低位，但沽壓有限下回升，拗腰倒升，半日最多升178點，見21206點半日高位。恒指中午收報21200，升172點；國指升40點，收7208；恒科指升63點，報4219。半日成交額只有513.31億，反彈成交縮，始終缸邊友都唔多積極入場。
藍籌股普遍上升，友邦(01299)半日升2.6%；連同ATM三科技重磅股上升，四股向恒指貢獻近百點升幅。騰訊(00700)、美團(03690)跟阿里巴巴(09988)半日升逾1%。京東(09618)跟小米(01810)半日分別升1%及2.6%，亦對大市出咗分力。除咗呢幾隻重磅科技股之外，內需股表現亦突出，李寧(02231)半日升6.3%，成為表現最好藍籌股；申洲(02313)跟安踏(02020)分別升5.5%及3.7%。其他內需股，除咗體品股之外都有唔錯表現，海底撈(06862)、潤啤(00291)跟農夫山泉(09633)等，升幅由3%至5%不等。
雖然澳門第一季度貴賓博彩收入降至2020年第三季以來最低，但濠賭股今日亦隨大市反彈，不過內地疫情仍反覆，更有多處有限度封城，務求達到清零目標，估計短期內地難以完全解封，呢一下反彈不宜追貨，始終內地疫情反覆，濠賭股嘅升勢難以持續。
內地雖然已宣布降準，但降準幅度不如預期，而4月貸款市場報價利率(LPR)未有如市場預期下調，內房股跟物管股跑輸。碧桂園服務(06098)半日跌6.2%，成為表現最差藍籌股。其他內房股跟物管股普遍腳軟，跌幅由1%至4%不等。
油價跟商品價格隔晚急挫，資源股今日遇沽壓，黃金股閒閒地跌5%或以上，其他資源股亦見下跌，跌幅由1.8%至最多嘅五礦資源(01208)跌8.5%。三桶油今日亦下跌，中海油(00883)明日A股掛牌，而首季業績突出，多賺逾62%，但半日仍要跌1%。記得過往但凡有A股上市嘅H股，H股股價必被帶動向上，不過升勢通常只係曇花一現，跟住H股嘅股價都會打回原形，甚至展開漫長跌浪，中芯國際(00981)就係一個最好例子。所以持有中海油股份嘅，都要留意一下明日A股上市後，H股走勢如何，有乜唔對路三十六着，走為上着。
麥狄文
(徐狄怡‧證監會持牌人)
