正所謂「食唔到個橙，都執返個柑」，噚日朝早揀定隻恒指牛出唔到貨之後，去到下半場再重新檢視整個走勢同牛證嘅條款，再揀過隻恒指牛(65604)出嚟，吼10分鐘線指數上破到「圓底」頸線就進場。
其實都真係唔駛等好耐，以噚日另一處出文時間下午1時31分計，喺10分鐘圖上，1點40分嗰粒燭已經上破咗「圓底」頸線，以呢個時間去入隻(65604)，拆返開以五分鐘圖計，入市位on top加15分鐘作為入市時間，以(65604)期內高低位做過0.06元/0.056元計，平均買入價為0.058元。入市後無耐， 大約2點左右，指數已經向上再殺多一層街貨，22400至22499點嘅過千張期指重貨即時玩完。
雖然指數繼續呈上，不過，喺五分鐘圖都留意到Slow STC(14,3)兩線都已經上到嚴重超買範圍，知道(65604)隨時都只能夠爬格仔。再去到2點20分，五分鐘圖上都見Slow STC(14,3)明顯回落，呢個時侯再望望隻(65604)，證價同平均買入價都唔係爭得好多，但咁嘅環境都係走咗佢算，星期二(4月5日)紅日，以2點20分 on top加15分鐘走貨時間計，(65604)高低位做過0.06元/0.057元，平均走貨價為0.0585元，算是打個和但賠了手續費。
呢個清明假期，無同屋企人去拜公公，一來限聚令，二來婆婆早排確診後啱啱好番，都唔想佢咁快又要去啲比較人多嘅地方，由於屋企係拜神上香嘅關係，所以大家都各自買一啲金銀摺好之後再以燒嘅方式「速遞」比公公，我成日都諗到底佢係咪真係會收到，Anyway，唔會有人知，隨時到我知嘅時侯，我都無辦法話到比一個「人」知。
假期過後，今日A股同北水終於都返嚟，不過指數完U後低開282點，先跌為敬之下，喺開市後一度低見22078點(截至9點43分止)，五分鐘圖上見Slow STC(14,3)兩線由完U時嘅中軸向下落到依家差不多兩線都處於超賣範圍，低開高走雖然唔係定律，但係喺五分鐘圖見今日開出嚟首兩支燭嘅低位構成爭2點嘅「平底」，勉勉強強都比佢過啦。
再睇埋日線圖，指數日今下行但喺日線圖上仲未見有任何技術突破，10天線(約22001點)仍然守住指數，不過Slow STC(14,3)兩線於嚴重超買水平有作勢觸頂回落嘅情況，怕且22000點隨時又展開好淡攻防戰。
嘿，講真，日線圖咁耐嘅嘢關我鬼事。依家9點52分，喺五分鐘圖上已經見到指數有750分鐘線(五分鐘圖150線)做埋支持推高指數少少，Slow STC(14,3)兩線都出觸底回升，下一關應該就係50分鐘線(五分鐘圖10線)，以恒指現價(9點54分報22199點)計，牛熊證中間價為22299.5點，指數稍為低於中間價100點。
嚟到10點打後，指數喺五分鐘圖上本以為可以靠住爭2點「平底」而再彈返高啲，但可惜未見50分鐘線，連500分鐘線(五分鐘圖100線都破唔到，就算熊仔再肥，但距離愈嚟愈遠呢。莫非真係要見22000點開攻防戰先開心？
既然係咁，就算指數落到22000點時向邊一個方向打。向上踩得住日線圖上嘅10天線的話，恒指牛(65611)，收回價21600點，同現價有逾500點差距，約40槓桿夠做DT；反之，22000點弱不禁風，恒指熊(54489)，收回價22600點，同現價有逾470點差距，約32倍槓桿都夠㗎啦，就睇住條日線圖嘅10天線啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
