今次中華煤氣(00003)維持全年派息0.35元與往常廿年一樣，但就因停止送紅股，因此有人話就令小股東不悅開始拋貨，把多年對中華煤氣的感情來個斷捨離，幾個交易日就跌近一成七，問讀者一個問題，如果今次中華煤氣仍然照舊派紅股，回復10送1，又或加碼到5送1紅股，這樣肯定皆大歡喜啦！不過但就停止派息，你估中華煤氣股價會點呢！照跌？橫行？或大把人追貨急升？
今年送紅股明年才找數
中華煤氣過往穩定派息每年0.35元超過廿年歷史，再由2010年開始10送1紅股，隨即迷到萬千股民甘願與之長相廝守踏上漫漫長長路，當然中華煤氣菅理層亦曾有過出色的表現，否則亦不會吸引到一班基金佬願意用這麼高估值而持貨多年，來解釋一吓其實每年派0.35元股息不變，但就因去年有10送1紅股，變相應該實收是0.35元+0.035元=0.385元，因此散戶就貪其等如年年派息有增長，更況且過往股價又平穩、多年維持只升不跌的佳績。
不過早於2019年半年業績前後很多基金佬已覺不妥巳開始慢慢減磅，再到公布2019全年業績就宣布改為20送1紅股，在基金佬眼裏中華媒氣因為可保持每年收息多一成才願意用超高估值持有，現在派息增長減一半當然唔滿意兼唔願再比這麼高估值，不過只要大家再細心諗一諗還有一個重要問題，就係中華煤氣派紅股基本上於當年只是數字遊戲，對公司總派息金額之影響只會在下一個年度，假設今年公司總股數100股，同時10送1股，今年公司總共派息100股X0.35元=35元再加10股送給股東，但下一年就有110股等收息。
基金佬一早見唔妥
話回來就在2019年中至2020年底，中華煤氣股價就由16元一路跌到接近10元邊，成班基金佬一齊拋貨而且認為20送一之股價合理只在11-12元之間，就此20送1紅股連續出現兩年，在第二年股價並無特大變動，因基金佬第一年已做定第二年防禦措施，但到今年就跳出班基金佬思維，半年業績時都OK ，但竟然全年業績有所倒退再加上停派20送1紅股，成班基金佬嬲到震因此就出現股價大插水現象。
業績一年差過一年
如果睇開本欄早在2019年8月一篇「煤氣傷盡散戶心」、2020年4月一篇「煤氣低息兼漏氣」已指出其早已今非昔比，中華煤氣再加上今次被班基金佬離棄，相信要一段頗為長的日子在低位橫行，建議現時亦非博撈底的時機，就算昔日如何如何煤氣有過輝煌日子又如何，那怕曾經是獅王都有過氣的一刻，知道坊間對「3」號仔有著說不出的感情，但仍要清醒睇睇由2018年或之前的派息比率也都維持於65%左右，財務屬健康正常，但由2019年至2021之三年間分別為89%、104%、130%，即家底夠厚就算過去兩年賺埋唔夠派息也可用過往積蓄支持，你話班基金佬見到現時班煤氣管理層一年不如一年點會唔走呀！要留意就係今年連紅股都唔送，就係唔想下年股數比今年大5-10% 增加派息壓力，管理層是穩健還是知道來年業績仍然難以扭轉呢！
梁健雄
筆者未持有上述股票
編按:作者梁健雄，香港財務策劃人員總工會副理事長，從事金融業達20年，曾任職多份報章包括英文虎報、南華早報、華爾街日報等後勤製作部工作。《炒股讀心》逢每周四跟讀者分享投資心理
