噚日揀咗隻平保(02318)出嚟,都揀定埋隻平安牛(64152),喺噚日朝早11點5分至11點20分,見股價回落到五分鐘圖上的保歷加通道中軸作為偷位買入,平均買入價為0.0835元。
當然都有set定止蝕同止賺位,事關指數呢兩日暴力反彈得太過暴力,做開淡嘅都未必能夠一時三刻分得到係唔係確認轉勢,有得做到短線就做短線,捱得過短線嘅止蝕位先至將戰線時間拉長。喺噚日下晝1點40分,股價於五分鐘圖上終於失守返保歷加通道中軸位置,(64152)亦不宜留,以1點40分起計15分鐘走貨時間,按(64152)高低位做過0.089元/0.085元計,平均沽貨價為0.087元,平均賺幅為4.19%,當發咗場夢。
指數報復式反彈兩日之後,今日見回落,恒指完U後開市報21232點,跌268點。到正式開市之後,恒指好快將跌幅再擴大多百零點,五分鐘圖上見指數一下子向下穿過保歷加通道底線,而Slow STC(14,3)兩線亦於超買範圍見回落,都真係合理,恒指璉續兩日升返咁多,稍稍回調當比返啲熊證抖下氣都要。
喺日線圖上,本來噚日收市時見到「十字星」,不過完U後,由於U盤再推高指數,所以變咗以全日高位收市,令「十字星」變咗「T星」,都似「吊頸」,仲要喺20天線出現咁嘅陰陽燭形態,就算唔理市場情緒,單純以呢個走勢圖嚟計,圖表派都會入定淡倉過夜。
依家10點6分,恒指開咗市半個鐘多啲,其實指數低開後落多一下之後,都幾乎以橫行情況運行,睇返小時圖見指數目前頭頂有條100小時線(小時圖100線)頂住,但同時下方又有條10小時線(小時圖10線)抽緊上嚟,Slow STC(14,3)已經連續兩日行咗超買再超買嘅走勢,事關保歷加通道口目前仍然拓闊中。咁搞法怕且隨時要到下半場先至揭曉。
望望日曆,今日星期五,周線圖最新支燭準備行完,大幅度向下插落之後再大幅度抽升返,形成長長嘅下影線,Slow STC(14,3)兩線剛好又見觸底回升,上星期留落嚟嘅裂口唔知補唔補得到呢?
上半場暫時唔出倉,睇睇下半場小時圖10小時線同100小時線爭奪戰之後先再作決定。
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。