有報道指烏克蘭武裝部隊向4個盧甘斯克共和國(LPR)地區發射迫擊炮彈和手榴彈，俄烏局勢再度緊張，雙方隨時擦槍走火，戰事一觸即發，消息拖累港股中午收市前急挫逾百點，失守10天線(24633)，暫仍守20天線(24442)跟100天線(24408)。
恒指高開3點報24861，開市早段窄幅波動，其後升幅一度擴大至142點，見24861半日高位，但突然傳出烏克蘭局勢緊張，大市掉頭倒跌，更以半日低位收市。恒指半日報24564，跌154點；國指收8630，跌48點；恒科指跌20點，報5595。半日成交額只有559億，雖然午前急挫，但成交未算顯著增加，沽壓未算好嚴重。
藍籌股大多受壓，友邦(01299)由升轉跌，半日回0.3%。大笨象(00005)下周派成績表，半日股價跌1.4%，之前阿Man 講過大笨象要上破60元有難度，呢個位又偏偏真係過唔到，下周業績稍有令市場唔滿意，股價有機會下探56元支持位。重磅股港交所(00388)下跌1.4%，喺近日成交額持續萎縮下，港交所股價亦難有作為。其他藍籌股普遍受壓，反而近期弱勢嘅藥明生物(02269)反彈3.8%，成為表現最好成份股。
航空股半日回落，內地航空股跌1.5%至3.4%不等，國泰(00293)反而跌幅溫和，半日僅跌0.4%。其他航空業相關股份全線下跌，喺地綠政治局勢緊張下，航空股難有運行。加上內地致力將疫情清零，要全面回復國際航線運作，應仲有段時間，而航空股喺之前升咗咁多之下，要再向上推進應有難度。物管股今日見沽壓，而內房股則個別發展，阿Man一直睇好嘅碧桂園(02007)半日未見下跌，其他內房股個別發展，物管股則偏軟居多。
目前俄烏局勢未明朗，任何一個消息都可以左右大市上落，暫時如果恒指能守住多條移動平均線，市底尚算硬淨，又唔算太差，有意造淡都要小心。
麥狄文
(徐狄怡‧證監會持牌人)
