隔晚聯儲局議息一如預期維持息率不變，但鮑爺就放鷹，話依家嘅政策未足以應付通脹，所以唔排除跟住落嚟每次開會都加息，換句話講，即係今年有機會加夠7次息，咁鷹嘅口吻，有乜辧法唔震散股市，美股先升後回，拖累亞太區股市大散。港股裂口低開後，喺道指期貨顯著下跌下，恒指跌逾600點，失守50天線(23867點)，超過八成股份下跌，跌勢都幾全面。
恒指低開337點報23952，開市已失守24000關，其後愈跌愈多，50天線亦告失守，最多跌649點，見23640半日低位。恒指半日收報23664，跌625點；國指報8256，大跌256點，恒科指報5344，跌252點，跌幅達4.5%。
藍籌股幾乎全線下跌，重磅股中只有大笨象(00005)逆市升0.2%；港鐵(00066)逆市升0.7%，已經係表現最好藍籌股。其他重磅股閒閒地跌2%，友邦(01299)半日跌2.6%，失守85元。其他內銀內險股亦腳軟，雖然歐美加息，但內地放水，加息呢個消息幫唔到佢哋。
科網股跌勢更為顯著，沽壓沉重，ATMXJ齊齊過堂，當中小米(01810)再破52周低，跌穿17元後跌勢更急，完全唔識停，難怪有缸邊友叫小米做西米，皆因股價走勢一路向西。阿里系一門兩傑，阿里巴巴(09988)半日跌6.5%，家陣已有口痕友打賭，幾時阿里破百，失去紅底股身份。騰訊(00700)跟京東(09618)半日分別跌3.2%及4.8%，今日科網股跌少過半成已算本事。其他科網股跌超過3%，其中嗶哩嗶哩(09626)急墜11.8%，為表現最差恒科指成份股。
藥股食咗瀉藥咁款，皆因聯儲局放鷹，高估值股捱沽，生科股估值一向唔平，加上部份更無盈利，防守性當然低，整個板塊今日表現差強人意，唔少股份均跌逾一成，藥明系三股跌幅喺一成之內已跑贏同業。
內房跟物管股亦回軟，恒大(03333)稱爭取半年內提重組方案，並會積極與債主溝通，本來係好消息，至少唔使行到摺埋嗰一步，但內房跟物管板塊今日都難逃一跌，而跌幅較少都係財務狀況較佳嘅內房，好似潤地(01109)、龍湖(00960)跟中海外(00688)，仲有民企代表碧桂園(02007)，半日跌少過2%。其他被債務問題困擾嘅房企，半日閒閒地跌半成以上，當中時代中國(01233)大幅折讓17%配股抽水，半日急挫近三成，上述幾隻財力較雄厚嘅內房股，表現已算好得多。所以有心趁平收集內房股，都係睇住潤地、龍湖、中海外跟碧桂園，其中又以碧桂園最為落後，值博率較高。
麥狄文
(徐狄怡‧證監會持牌人)
