美股隔晚表現反覆，不過市場仲等緊議息結果，只係大家都無乜期待，皆因目前嘅數據不足以令聯儲局停止收水，聯儲局唔會因為美股震盪而退縮，縮表收水將要去馬，甚至有專家指目前貨幣政策嚴重落後通脹曲線，就算今次議息就宣布加息都唔過份。比較有趣嘅係有美股燈神之稱嘅股壇名嘴克拉默(Jim Cramer)，話科技股仲有排跌，呢條友過去多次睇錯市，今個月初更叫人買Netflix，本來好地地嘅Netflix都畀佢燈死，家陣佢吹淡科技股，難怪有美股缸邊友話美股有可能見咗底。
美股走勢暫時反覆，港股亦唔好得去邊，暫時叫守住24000水平整固緊，可惜係內地股市喺四大官媒唱好下，高開低走，港股上半場升幅大大縮水，暫時受制100天線(24561)，表現麻麻。恒指高開99點，報24342，其後一度升243點，見24487半日高位，可惜100天線失守後，變成短線阻力，加上內地深成跟創業板指數倒跌，拖累港股一度跌21點，見24221半日低位。睇嚟下半場要小心，24200都未必企得住，恒指半日收24283，升39點；國指升13點，報8517；恒科指升40點，收報5593。
藍籌股個別發展，大笨象(00005)半日升2.8%，似乎調整完成，暫時未上返條10天線，要再挑戰55元水平都要時間。金融股叫造好啲，重磅科技股早段造好，但其後升幅收窄，ATMXJ之中，又係阿里(09988)跟小米(01810)表現較為落後。申洲(02313)半日插6.7%，藍籌之中跑第尾。
電力股今日有啲起色，國家主席習近平在中共中央政治局第三十六次集體學習時提到，要加大力度規劃建設大型風光電基地，相關股份以信義光能(00968)表現最好，半日升8.4%，藍籌之中升幅最大。其他新能源股表現唔錯，阿Man噚日撈底嘅龍源(00916)半日亦升近7%，低位抽升咗成蚊上嚟，短炒又可以食一食。
教育股死咗一排，無啦啦市場又再憂慮醞釀政策禁止境外上市教育股持有任何內地學校資產、併購等，其實呢個憂慮都講咗好耐，噚日教育股已死死吓，今日繼續暴跌，當中中教(00839)半日跌逾兩成，其他教育股閒閒地跌近一成。生物科技股沽壓沉重，龍頭藥明生物(02269)半日跌5.1%，其他板塊內股份，閒閒地跌超過4%。呢兩個板塊暫時未跌定，尤其教育股大洗太平地，千祈咪見跌得急多手接飛刀。
距離農曆年假期得返兩個半交易日，暫時港股叫做守住二萬四關，但北水明日開始休假至初七先回復正常，呢幾日提早收爐亦無損失，暫時少做少錯，玩少幾日去辧年貨，好過喺市場多手亂撈貨。
麥狄文
(徐狄怡‧證監會持牌人)
