熱門:

2022年1月11日 即巿股評 港股直擊

【盤房來料】年關將至例水緊 成交縮反彈弱

鮑爺喺聽證會表示貨幣政策會配合經濟增長步伐而調整,繼而又話美國今年經濟增長會係呢幾年以嚟最勁,即係暗示加息力度可能加大,收水亦會提速。美股隔晩就玩咗過山車,道指一度大插近600點,之後跌幅收窄,而納指喺急挫2.7%後倒升收市,美股都算硬淨。其實市場對於加息預期有晒心理準備,又係乘乘機機搵個藉口,繼續殺估值。

港股今早低開高走,企咗上條10天同20天線後,進一步向住條50天線,即係二萬四水平推進。恒指低開67點,一度跌145點,最低見23600,其後掉頭回升,半日最多升117點,見23863點半日高位,其後升勢回順。半日恒指報23833,升87點;國指升43點,收報8408;恒科指報5654,升28點。

藍籌股個別發展,騰訊(00700)擬收購小米(01810)注資成立嘅遊戲公司黑鯊科技,兩股此起彼落,騰訊半日升1.6%,小米半日跌1.4%。其他ATMXJ成員表現各異,美團(03690)跟京東(09618)分別升1.9%及2.7%;阿里(09988)則跌1.4%。人家Tsela(TSLA)喺美國一跌穿1000美元就反彈,可憐港股呢邊嘅汽車股,今日市彈都唔識彈,吉利(00175)半日跌2.8%,更成為表現最差藍籌股。

內房物管股今日繼續反彈,行業喺阿爺鼓勵下,開始併購,估計爆煲高峰期已過,家陣開始整合。噚日急升兩成嘅世茂(00813),同買家斟緊出售幾項物業套現,自己生意自己救。而其他內房股跟物管股續有資金追捧,不過阿Man就唔會升嗰日嚟追貨,即使內房股最差嘅時間過咗,但股價表現仍然反覆,同埋要買都吼幾隻優質嘅大隻佬嚟買,潤地(01109)、龍湖(00960)、中海外(00688)同埋碧桂園服務(06098)值得趁回吐收集。

生科股表現迴異,藥明系表現唔錯,幾時都話要吼呢個板塊,都係揀返龍頭,藥明生物(02269)半日升逾6%,藥明康德(02359)半日同樣升逾6%,但康希諾(06185)有大手上板,傳有主要股東減持,股價半日跌逾6%,同一板塊,不同命運。

暫時港股都係咁款,噚日講咗有反彈,但成交未能完全配合,動力仍不足夠,尤其逼近50天線更需要時間去企穩,至少要企穩24000,港股先有條件進一步向上,至於100天(24682)同250天線(26980)暫時仲係遙不可及。內地又要過年關,例牌手緊,北水買貨又點會咁鬆手,喺缺乏資金推動下,港股暫時都係反覆,只能跟住資金輪動,打游擊度日。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads