美股繼續插水，除咗因為變種病毒全球擴散，市場憂慮疫情拖累經濟復甦之外，仲有美國拜登政府嘅投資法案或未能獲通過，掌握「重建美好未來」法案關鍵票嘅民主黨參議員曼希上周日表明唔會支持法案，高盛表示，法案若未能通過，下調美國GDP預測。美股三大指數顯著下跌，道指盤中更跌近700點，收市跌433點，標指跌52點，納指跌188點。
恒指高開50點，報22795，升幅曾擴大至168點，見22913半日高位，但23000由之前嘅支持變阻力，呢個位沽壓大。大市一度升勢不保，最低見過22730，轉跌14點，但低位有買盤支持，大市止跌回升。恒指半日收報22865，升121點；國企指數報8095，升52點；科指半日升23點，中午報收5521。半日成交只有549億元愈玩愈縮，可能同今日冬至，唔少人已提早收爐有關。
藍籌股個別發展，大笨象(00005)跟友邦(01299)半日齊跌0.1%，京東(09618)連跌七日，半日再跌0.5%，睇下下半場有冇機會止跌回升。信義光能(00968)半日跌4.6%，表現最差；相反母公司信義玻璃(00868)發盈喜，股價今日彈返6.1%，係表現最好嘅藍籌。至於AMTX，除咗阿里(09988)之外，都叫有得彈吓，不過彈力當然係麻麻，假日情懷漸濃下，缸邊友真係無心戀戰，市場缺乏資金流入，自然易跌難升。
內房股今日反彈，花樣年(01777)附屬債券獲延期，帶動內房股普遍回升。雖然板塊內嘅股份，半日反彈超過1%至7%，但講真，阿爺雖然放水，但都未有向房地產板塊投放資源，各內房企業嘅債務問題，仍得自己解決，唔夠錢嘅公司，一係就出售資產套現，一係就配股向市場抽水。一日半日嘅反彈就當睇佢唔到，內房股維持避之則吉嘅策略。
電力股本身係強勢，大市一反彈，呢個板塊亦會有追捧，暫時呢個板塊都係採取低買高沽嘅短炒策略，跌得急嗰日撈一撈，見反彈返三幾個巴仙就食糊鬆人，炒住range先無蝕底。若然游游下水，游出咗公海，切忌高追，好易又被套窂。
臨近聖誕假期，預咗個市會偏淡靜，尤其本身港股市底較弱，呢段時間都係少做少錯，唔做唔錯，祝大家冬至愉快，提早收爐返屋企同家人過節啦。
麥狄文
(徐狄怡‧證監會持牌人)
