人家美國議息唔太鷹,結果噚日美股三大指數回升,美股仍然欣欣向榮,相反港股就死下死下,皆因美國再制裁中資企業,總統拜登簽署一項新行政命令,對中國四家藥企實施制裁,港股今日再下跌,更創下近15個月低位,恒科指則盤中創新低。
恒指低開132點報23287,跌幅曾縮至37點,見23383半日高位,但恒指連跌四日累跌834點,沽壓未見減少,更跌穿11月30日23175點低位,最多跌265點,低見23155,創去年9月25日以來低位,之後跌幅收窄至兩百點內。恒指半日收報23231,跌189點;國企指數報8250,跌92點;恒科指一度低見5681創新低,挫2%,半日收跌83點,報5712。跌市大市半日成交751.2億元,呢幾日淡靜嘅市況中,呢個半日成交額算多。
藍籌股普遍下跌,其中比亞迪(01211)跌足七日,半日再跌2.5%,睇嚟100天線(約237.7)失守後,大大力劏牛,雖然265-269牛證重貨區已陣亡,但打後到250都係重牛區,今日比亞迪若然唔識彈返上100天線,睇嚟啲重牛都凍過水,要落到240-250先有支持。友邦(01299)跟平保(02318)微彈,齊齊彈返0.6%,但銀行股就跟市跌,跌0.5%嘅大笨象(00005),跌勢算溫和。
內地對科網股監管沒完沒了,內地有報道指,因質量監管缺失,京東(09618)、阿里巴巴(09988)旗下拼多多及淘寶遭約談,京東半日跌近半成,藍籌之中跑第尾。其他科網股亦腳軟,ATMX無一倖免,小米(01810)半日跌1%,失守18元重要支持位。騰訊(00700)、阿里跟美團(03690)分別跌1.9%、2.7%及4.1%。其他中概科網股亦走弱,半日跌0.2%至超過半成不等。
內房及物管股反彈,彈得最勁係之前仆得最直嘅奧園健康(03662),半日升近一成,其他內房跟物管股普遍反彈1%至不足5%不等。煤炭股係今日較亮眼嘅板塊,兗煤(01171)公布發展戰略綱要,中午狂升近兩成,中煤(01898)亦升一成,反而最大隻嘅神華(01088),半日只係升咗3.7%,煤炭股之中升得最少。
噚日一個制裁傳聞炸爆咗大部份生科股,當中藥明生物(02269)收市跌近兩成,堂堂藍籌股單日咁嘅跌幅,認真失禮。不過藥明宣布啟動回購計劃,斥資5億美元回購股份,並指營運一切正常,股價半日彈逾6%,喺生科股中彈力算唔錯。雖然暫時未見香港呢啲上市嘅生科股被正式列入制裁黑名單,不過家陣投資信心薄弱,一個半個壞消息,啲股份就食咗瀉藥咁,難怪今日反彈,見唔少散戶趁機逃生。
麥狄文
(徐狄怡‧證監會持牌人)