真心，呢兩三日都係捉定恒指Put出嚟做部署，但可恨嘅係點都搵唔到一個位將隻Put落場。如果，喺噚日朝早10點35分，雖然只係得%K線上到80以上水平，嚴格嚟講都唔可以話Slow STC(14,3)進入超買位，但如果當時狠狠地將隻恒指Put(25566)落場嘅話，咁噚日下晝因為「Two Dozens」單嘢而推冧成個指數嘅跌幅，就可以用隻(25566)接住。
不過，永遠都係「有早知，無乞衣」，見到今朝恒指完U再跌多百幾點開市就明；去到依家10點鐘就更加明，因為指數跌幅已經擴大至逾200點，最低暫時見過23155點，換言之恒指牛證街貨首兩層，即23300至23399點，同埋23200至23299點嘅街貨都已經全部被收回，呢兩層夾埋有相當於608張期指，變相最貼價已經落到去23100至23199點，呢度有相當於879張期指街貨，但如之前所指嘅暫時低位計，都有部份證已經死亡。
睇返恒指日線圖，指數(計埋今日)見五連跌，不過Slow STC(14,3)兩線都仍未同步落到超賣範圍，而指數今日(截至依家10點16分止)最低做過23155點，低於11月30日嘅低位23175點，暫時睇似乎指數仍有一浪低於一浪嘅形態向下行。換上保歷加通道的話，則見保歷加通道底線為22985點，呢個位如果放喺依家牛熊證街貨圖上的話，即係會落到22800至22899點，途中會殺死23000至23099點嘅整口點數大位，呢一層今日見有逾1300張期指。
恒指Put(29049)，行使價22900點，低引伸、槓桿吸引，再嚟等指數五分鐘圖見Slow STC(14,3)上到超買位落場，不過隨時玩埋今個星期好啦，因為喺週線圖見到出穿x破x嘅形態，同步Slow STC(14,3)都見到有似觸底嘅走勢。
又係嘅，希望2021年恒指可以守得下23000點啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
