雖然美國嘅通脹數據爆晒燈，去到39年高位，但數字都算符合預期，加上市場已有足夠心理準備聯儲局或會加快收水，所以上周五美股繼續做好，標指更再創收市新高。而內地中央經濟會議上周五結束，定調明年「穩中求進」，今早中港股市本周開局，亦能做到「穩中求進」。
恒指高開246點，升幅曾略為收窄，低見24183點半日低位後升幅擴大，最多升389點，見24385點半日高位，重上20日線(24360)後升幅收窄，20日線得而復失。恒指半日升242點，報24238；國指升80點，報8659點；恒科指報6115，升80點。
藍籌股普遍向上，只有內房股受壓表現較差，而碧桂園(02007)半日跌2.5%，藍籌之中跑第尾。ATMX全線上升，當中以美團(03690)表現最好，半日升4.4%，股價重越250元。阿里巴巴(09988)彈返3%，但距離130阻力，仲有一段遙遠路程。騰訊(00700)半日升2.5%，暫時企喺475元，啱啱係短期阻力位，企得到，有條件進一步挑戰500元。小米(01810)半日僅升1%，ATMX之中呢期表現算落後。
中央經濟工作會議指出要適度超前開展基礎設施投資，再加上最近人行下調存款準備金率和社會融資復甦，可能會導致建築活動在明年初反彈，建材股今日做好。水泥同鋼鐵股做好，升幅由3.5%至一成不等。
光伏股亦有唔錯表現，因為中經會指出新增可再生能源和原料用能不納入能源消費總量控制。咁即係呢類公司產品同原材料都唔會過份監管，咁呢個行業自然有運行，信義光能(00968)半日升6.4%，係最佳表現藍籌股。其他光伏股升幅普遍超過半成。中央經濟工作會議指出要深入實施種業振興行動，提高農機裝備水平，相關股份亦受捧，不過半日急升，追貨都無乜意思。
大市暫時靠穩，但要進一步突破，都係要成交配合，暫時港股成交未成氣候，而新股亦未能帶動市場氣氛，幸而恒指已初步企穩24000水平，唯有一步步漸進，下一目標係24500點，呢個月上唔上到25000就似乎有難度，暫時港股只能寸進，要有更大突破，除非有重大利好消息跟成交配合。
麥狄文
(徐狄怡‧證監會持牌人)
