隔晚美股個別發展，納指跟標指再創新高，但道指則回吐，不過沽壓唔算嚴重。至於港股繼續疲弱，主要係因為內房債務又爆鑊，港股今早曾跌逾四百點，二萬五關失守。恒指低開274點，開市後跌幅一度擴大至418點，低見24806點，係10月8日後最低。不過24800水平有買盤支持，大市跌幅曾收窄至175點，見25049，其後大部份時間喺25000爭持。中午恒指半日收報24985，跌240點；國指午造8883，跌70點；恒科指跌48點，報6326點。
大笨象(00005)之前一直炒加息而向住48-至50水平進發，不過英倫銀行警告市場唔好對加息幅度太大期望，事實上鮑爺喺聯儲局議息回議亦講過，就算縮減買債計劃完成，亦唔等於要即時加息，睇啲美債無乜大變化，都可以估到就算加息幅度有限，亦無逼迫需要。大笨象半日跌5.2%，係表現最差藍籌股，佢嘅跌幅已拖低恒指成百點。ATMX亦腳軟，騰訊(00700)跟阿里(09988)跌逾2%，美團亦跌近2%，只有小米(01810)跌0.5%較少，口痕友話小米呢期升又唔跟大隊，跟隊跌落嚟，跌少啲都正常，暫時仍守20大關。
內房股跟物管股全線走弱，恒大(03333)債務問題沒完沒了，又到佳兆業(01638)違約畀唔到息，今日就輪到世茂(00813)債券價格大插，當中上海世茂建設發行2015年公司債券(簡稱15世茂02)，一度跌停，其股價半日跌8.2%，世茂服務(00873)半日亦跌7.6%。奧園健康(03662)正洽售物管業務權益，唔知係咪要賤賣資產，奧園健康半日跌23%，母公司奧園(03883)亦跌13%。板塊內其他股份均見跌軟，阿Man話咗內房跟物管股呢期都無運行，避之則吉，跌得多唔係買貨理由，咪多手又招損失。
紐約期由隔晚跌穿80元，三桶油腳軟，中石油(00857)跌近4%，中海油(00883)跟中石化(00386)半日跌逾1%，其他油服務亦腳軟。鋁業股今日亦顯著下跌，跌幅閒閒地半成以上，主要係內地期鋁今早急跌。
又到星期五，又係要忍手嘅時候，今日反正都無乜好搞，阿Man就睇實啲電動車及新能源股，龍源電力(00916)今朝未能升破19元又回吐，中午曾跌穿18元，又係上車好機會，暫時玩住17.5至19元呢個range 先，龍源要破頂，至少要企穩19-20元水平，一日未向上突破，高沽低買炒住range 先，有助減持持貨成本。
麥狄文
(徐狄怡‧證監會持牌人)
