噚日最後揀咗隻恒指Put(25872)，目的係睇住小時圖Slow STC(14,3)博出高位回落，不過策酪上仍然以五分鐘圖Slow STC(14,3)喺超買位時先至出手，等到下晝2點55分，Slow STC(14,3)兩線終於都齊齊上返去80以上嘅超買水平，及至3點5分先至再見Slow STC(14,3)回落，以呢段時間出隻(25872)的話，當時高低位為0.143元/0.141元，平均買入價為0.142元。
其實喺3點5分打後見五分鐘圖上Slow STC(14,3)向下回落，回落到大約10點20分左右，Slow STC(14,3)嘅%K線落到20以下水平，但%D線同時只係落到40幾附近，本以為指數可以再向下落多少少，直至兩線殺落超賣，但可惜Slow STC(14,3)已經回升，指數亦重上五分鐘圖水平之上，及至恒指收市完U盤時，指數跌幅進一步收窄，(25872)輪證縮上得返0.138元。
呢兩日天氣都開始轉涼，不過頭先睇新聞，天文台又話下個星期又會開始熱返，唔理啦，拎定咗個暖窩出嚟比我家肥貓有必要時就匿入去取暖，不過我發現佢唔係好識用...是但啦。終於都見恒指完U盤，開市升97點，再爬返上26100點樓上，開報26114點，聊天室裡面有人揸好倉過夜，亦有更多嘅人揸淡倉過夜，依家只能夠唯有等恒指開市後，Slow STC(14,3)拉到盡比佢升完之後，高位回落時再搵位走。
依家9點48分，恒指暫呈高開低走，聊天室裡面嘅戰友好淡倉都見到有收割，大家都唔貪心，正所謂有食唔食，罪大惡極嘛。而隻(25872)依家輪價都見返0.138元，暫時賬面輸四格，無啦辦法啦，鬼叫出呢隻本來就睇下小時圖條Slow STC(14,3)高位回落至中軸之後會繼續向下走，但似乎依家喺小時圖上面有條20小時線(小時圖20線)支持住，就睇下稍後時間指數可以穿得過20小時線，還是要蝕住走。
望望月曆，今日10月22日，過埋今日即係仲有一個星期就完整個10月，今個月暫時望返所有做trade嘅成績都係麻麻地。過咗10點，小時圖開第二粒燭出嚟，指數都仲喺企得返喺10小時線(小時圖10線)同20小時線之上，恒指升幅略為收窄至升40幾點，呢兩日波幅都真係偏細，八掛望下個恒指波幅指數(VHSI)，原來日線嘅VHSI Slow STC(14,3)兩線於超賣水平，仲行出超賣再超賣，換言之VHSI嘅Slow STC(14,3)彈起時，VHSI亦可能跟住上，咁恒指嘅波幅就會大返，隨時新一輪剷羊毛行動又開始。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
聊天室/Patreon：https://www.patreon.com/cbbcwar
Facebook：https://www.facebook.com/cbbcwar
