美國通脹有放緩迹象，8月消費物價指數(CPI)按月升0.3%，低於前一個月的0.5%和市場預期的0.4%，即係聯儲局無逼切性收水，不過就增加咗聯儲局縮減買債規模嘅不確定性，美股先升後跌，三大指數全線下跌，無一倖免。港股連跌兩日，恒指跌逾700點後，今早跌勢持續，一度跌逾300點。
恒指低開192點報25310，內地公布上月「三頭馬車」數據，包括工業、零售和固投數據，全部遠差過市場預期，恒指曾跌370點，見25131點半日低位，之後跌幅收窄，恒指曾僅跌90點，見25411點半日高位，但其後跌勢持續，暫時險守25200水平。恒指中午報收25259，跌242點；國指則跌59點，盤中曾失守9000大關，半日跌59點，報收9022點；恒生科指則跌121點，報收6380點。
藍籌股ATMX除咗小米(01810)半日靠穩，逆市升0.4%之外，騰訊(00700)、美團(03690)跟阿里(09988)分別跌2.8%、3.3%及2%，喺監管陰霾未消退下，科網股都係keep住弱，持續有波幅，冇升幅。
不過，濠賭股表現更差，因為澳門政府今日起就修改《博彩法》展開諮詢，為賭牌重新競投鋪路，建議包括禁止發放副牌、重新審視現時賭牌最長可達25年的期限、賭牌主分配利潤前須符合特定條件並要獲政府許可，以及政府派代表進駐博企。呢啲措施令濠賭股續牌更添不明朗，整個板塊今日顯著下跌。
全線濠賭股今日裂口低開，開市後跌幅擴大，純外資嘅金沙中國(01928)跟永利澳門(01128)半日跌逾兩成，泊住賭王何家大小姐嘅美高梅中國(02282)半日跌18.7%；銀娛(00027)、澳博(00880)跟新濠國際(00200)無外資參與，成功續牌機會較大，但半日三股仍要跌超過成半。暫時喺續牌不明朗因素下，唔建議接飛刀博反彈。寧買當頭起，莫買當頭跌。
恒大(03333)債務危機仍未解決，甚至開始拖累其他內房股，而市場亦擔心內銀股嘅資產質素下降，噚日內銀股跌完今日有得彈，不過內房股就無咁好彩，今日繼續受壓。而高盛更下調多隻內房股評級，內房股跌幅由1.2%至超過半成不等。石油石化股繼續逆市走強，主要係擁擠交易下，資金湧入，一旦資金流走，整個板塊可以回得好急，阿Man都係食花生算數，唔會高追。
麥狄文
(徐狄怡‧證監會持牌人)
