雖然阿富汗出現政權變動，市場擔心地綠政治風險上升，美股隔晚早段下跌，但美股勢強就係勢強，加上已公布上季業績嘅標指成份股，超過八成都交出亮麗成績表，美股又施施然上返去，道指跟標指再創收市新高。但港股就無咁本事，亦唔多跟美股走，加上A股又受壓，港股連跌三日仲未跌夠，今早二萬六關一度失守，睇嚟二萬六都係危危乎。
恒指低開43點，開市後表現反覆，曾倒升77點，見26258點半日高位，之後再度走弱，盤中跌195點，見25986點半日低位，臨近中午跌幅收窄，力守兩萬六樓上收市。恒指中午報26002，跌178點；國指跌84點，報9181；科指跌73點，報收6346。
友邦(01299)派完成績表，上半年新業績價值增加22%，半日股價升3.5%，暫時有貨睇住95止賺，無貨唔建議追，始終大市反覆走軟，唔知幾時大戶要質低指數，搵佢嚟開刀。另一隻業績股係舜宇(02382)，上半年賺多53%，但集團表示手機攝像模組單價按年下降幅度較大，早段低開曾見203.8低位後有承接，半日倒升6.3%，係最好表現藍籌股。不過平台股繼續走軟，阿爺對科網股未有手軟，ATM三大巨頭，騰訊(00700)跌3.7%、阿里(09988)跌2.8%，美團(03690)跌1.2%，之前講過平台股短期無運行，果然係有波幅，無升幅，連帶個市成為命運共同體，佢哋唔掂，個市亦唔多精神。
內地電訊股話晒都算高息，同埋估值算平，喺目前資金捨棄高估值股份之際，內地電訊股亦唔會受政策影響，成為跌市避風塘，中移動(00941)微升0.2%，中電信(00728)跟聯通(00762)分別升1.3%及1.8%。內地公布上月航空業數據後，中資航空股全線做好，升幅由2.1%至4%不等，連帶國泰(00293)亦升1.4%，航空業相關股份中航信(00696)跟首都機場(00694)半日分別升1.8%及0.9%。
港股真係愈玩愈頽，除咗一直受中美角力所困擾外，內地監管風暴沒完沒了，全球再受變種病毒攻擊，經濟復甦或受阻之際，卻又面對通脹升溫嘅煩惱，股市變得愈來難操作，中長線坐貨風險增加，短炒又唔多夠水位，值博率已愈來愈唔吸引。難怪港股令人心灰意冷，唔少新世代早已轉戰美股，至少唔會好似港股咁，反彈乏力，人跌佢跌，人升佢唔升。
麥狄文
(徐狄怡‧證監會持牌人)
