美股隔晚做好，標指跟納指再創新高，A股今早亦靠穩，不過港股跌咗兩日後，早段高開，可惜未有因半年結而高走，反而高開低走，半日更失100日線。恒指高開113點，可惜二萬九關得而復失，高開曾升152點，見29146點半日高位後即倒跌，一度跌97點，見半日低位28896點，再度失守100日線。恒指中午報收28948點，跌45點；國指則跌40點，報收10716點；科指微升8點，報收8210點。成交額縮水至680.49億元，假期前買賣兩閒。
藍籌股個別發展，大笨象(00005)跌0.3%；港交所(00388)跌0.9%；友邦(01299)斥資120億元人民幣收購中郵保險近25%，半日逆市升1.1%；舜宇(02382)創新高見247.6元後升勢回順，半日升0.3%。ATMX同樣個別發展，美團(03690)始終無法衝破330至340元之間嘅阻力，暫時ATMX都係行range，喺無特別利好消息刺激下，未能衝破悶局。
有消息指香港跟澳門之間，有意於下月中恢復有限度通關，來回兩地毋須檢疫，帶動濠賭股做好，龍頭銀河娛樂(00027)更升逾5%，其他濠賭股升3或4%不等。不過變種病毒仍然肆虐全球，一旦港澳兩地是但一度被變種病毒襲擊，防疫措施仍有機會隨時收緊，唔建議高追呢個板塊，加上假期前夕，食下花生做觀眾算數。航運股今日回升，主要係波羅的海指數持續做好，其實喺全球經濟復甦下，對航運需求有增無減，只係半年結再加埋假期前夕，例牌唔追貨，有咩都係放完假，甚至下星期先再作定奪。
科技股以二線股份表現較佳，半導體股做好，喺全球芯片需求持續，各國又利用政策挫持行業發展，資金對呢個板塊鍾愛不無原因。如果今日要喺科網股搵對象上車，阿Man會吼實明源雲(00909)，40元樓下收集，待下周成交回升配合，有望突破橫行走勢，向上挑戰45元阻力。
今日兩隻掛牌新股表現有別，奈雪的茶(02150)半日較招股價19.8元跌11.1%，抽中嘅缸邊友真係夠晒無奈。反而和黃醫藥(00013)半日高收59.85元，較招股價40.1元升近五成，有貨缸邊友中獎。之前阿Man提過值得留意嘅新股越秀服務(06626)果然有料到，雖然超額倍數唔多，不足3倍，但正正因為IPO未有派散，貨源可能盡入強中手，首掛日守招股價後連升兩日，今日最高見5.48元，較招股價4.88元進賬超過一成，阿Man推介都算對大家有交代。
麥狄文
(徐狄怡‧證監會持牌人)
