美股隔晚靠穩，市場等緊周五嘅小非農數據，以預測通脹壓力會否上升，逼使聯儲局要提前加息。不過聯儲局官員一再強調，即使出現通脹只係暫時性，寛鬆貨幣政策將會持續。港股今日繼續回吐，恒指再跌過百點，不過科技股個別發展，恒科指力保不失。
恒指高開67點報29365，升幅曾擴至80點，高見29377，但財新服務PMI公布後，大市升勢不保，雖然A股未見失守，上證加挺3600點，但港股就繼續腳軟，恒指掉頭跌150點，低見29147，最終恒指半日收報29179，跌117點；國指午造10916，跌35點；恒生科指逆市升，半日微升21點。唯一可以覺得安慰嘅係，今日港股繼續回吐，但半日成交額縮水至682億元，反映回吐壓力有限，買賣兩閒。
藍籌股中，金融股繼續腳軟，建行(00939)跟平保(02318)跌逾1%，大笨象(00005)則微跌0.1%，50元大關尚未收復企穩。而紐約期油隔晚創32個月高位，石油股繼續受捧，不過升勢已見放緩，三桶油半日升不足1%。
一直受美國制裁嘅華為，隔晚宣布正式推出自家研發嘅手機操作平台鴻蒙2.0系統，市場憧憬可推動5G加快應用，5G概念股乘機落鑊。中興(00763)飆7.2%；京信(02342)炒高10.8%；鐵塔(00788)急揚5.7%；中通服(00552)升4%；摩比(00947)漲3.7%，留意返，呢幾隻5G概念股，通常大陽燭急升一日又無影，咪多手高追。手機設備股同樣逆市上升，瑞聲(02018)半日升8.9%，成為最大升幅藍籌股，不過阿Man都係偏好舜宇光學(02382)多啲。其餘丘鈦(01478)升1.2%；鴻騰(06088)升3.1%。如果要講手機股，小米(01810)一真係阿Man至愛，而小米更而進化至多元化科技股，唔止手機，其他業務表現同樣出色，加上唔受反壟斷法影響，股價不經不覺已重返30元水平，只要企穩，下一站當然係32元。
浙江紹興再出調控「紹4條」，阿爺調控樓市未手軟，內房股普遍受壓，連帶物管股亦有調整，不過內房跟物管兩個板塊比較，阿Man偏愛物管股多啲，趁回吐收集，今日吼住華潤萬象生活(01209)，呢幾日幾條移動平均線滙聚一齊，只要守得住44.4，板塊氣氛改善，仍有機會向上挑戰50元。
另外汽車股都可以留意，電動車股最近翻生，而阿Man就吼返隻贛鋒鋰業(01772)，全球新能源汽車需求強勁，鋰價上升，都有利贛鋒鋰業盈利有提升空間。如果有跟開阿Man嘅blog，https://stockqueen.co/ZH/， 今朝已見推介，建議115至118元之間收集，今早剛好係收集區間，買咗坐定定等突破120元，企穩呢一關，上望目標135至140元。
麥狄文
(徐狄怡‧證監會持牌人)
