美國肺炎疫苗接種工作持續進行，進度尚算理想，市場對於經濟全面重啟感到樂觀，隔晚美股三大指數上升；當中出行股包括航空股及郵輪股全面向上，表現較為突出。雖然美股喺前幾個星期以嚟，跌咗四個星期，但道指及標指喺呢段調整時間之中，只係分別跌咗0.5%及0.4%，屬於相當健康嘅整固，而調整幅度較大嘅股份，都係一批估值較為昂貴嘅股份，反映市場發展健康，美股並未出現任何泡沫。唔單止美股靚仔返，A股亦抽高做好，兩大股市護航下，港股今日一口氣收復20日(28504點)及50日線(28658點)。
恒指高開49點，28461點成為半日低位，A股反覆做好，帶動港股順利升穿20及50日線，一度升近400點，見28802點半日高位，同樣係超過兩星期高位，恒指半日收市升358點，報收28770點；國指中午報收10742點，升101點；恒科指半日升90點，報收7967點。
今日升市火車頭都係阿Man心頭好，包括騰訊(00700)、藥明生物(02269)及小米(01810)，合共貢獻恒指203點，三股半日均升逾4%，藥明生物半日升5.7%係半日表現最好藍籌股；其他重磅藍籌普遍向上。安踏(02020)跟申洲(02313)半日創新高，半日升3.1%及1.5%，只有大笨象(00005)半日逆市跌0.3%。要數表現最差嘅藍籌，肯定係公布咗季績嘅中生製藥(01177)，開市一度爆升7.1%，半日倒跌3.2%，咁樣高開低走，幅圖相當難睇。
A股漸入佳境，近日表現愈戰愈勇，帶動內地券商股落鑊，升幅由1.4%至6.5%，當然係龍頭中金(03908)跟中信建投(06066)雙雙升逾6%。不過阿Man真係有啲忌諱，餐餐炒到呢個板塊，大市升勢就會窒住，真心想今次可以打破宿命，因為整體大市已呆滯咗一段唔短時間，所謂五窮月並未算太窮，亦嚟到尾升，六絕月會唔會走上絕路，真係要睇睇星期五期指結算後，大市能否進一步向上突破。
配股潮並未有因為五窮月而停落嚟，剛被欽點將為藍籌新貴嘅碧桂園服務(06098)趁股價喺接近高位配股集資，雖然中午跌1.7%，但暫時仍守住配股價。不過下月碧服被納入成份股，屆時有追蹤指數基金入貨，有助托住股價。科技股微盟(02013)亦配股集資，中午仍升2.7%，主要係因為微盟早已較高位大幅回落超過五成，喺接近呢幾個月低位先批股，再下跌空間有限，可以話微盟目前配股夠穩陣，但同樣公司真係唔夠醒目，唔識喺高位集資，同樣嘅集資額，可以配少一半股份，攤薄效應亦較細。
麥狄文
(徐狄怡‧證監會持牌人)
