美股上周四假期前做好，雖然呢個聖誕受疫情影響，民眾消費難免大打折扣，但米字旗國跟歐盟達成貿易協議，受到順利脫歐消息支持，市場氣氛保持正面。不過當晚喺美國嘅ADR表現就唔多正面，阿里(09988)被監管部門立案調查，連日被阿爺狙擊，平安夜當日半日市好唔平安，ADR較周四港股呢邊收市再跌逾5%，而喺美國上市嘅BABA當晚急挫13%；拖累騰訊(00700)ADR亦急跌至540.76元。
今早港股表現反覆，恒指低開98點，報26288點即見半日低位，開市後倒升，重上10日線(26382)，一度升127點，見26514點半日高位，但重返20日線(26452)後又回軟，中午收市前曾倒跌。恒指中午收報26391點，升4點；國企指數報10361點，跌68點；恒科指半日跌266點，急插3.3%，報7876點。
藍籌今日有兩件巨頭創新高，分別係保險股中，阿Man認為較為可取嘅友邦(01299)，以及長期愛股港交所(00388)，半日分別升3.5%及1%。其他藍籌無乜好講，今日焦點喺幾隻科網巨頭身上，國內平台經濟反壟斷，JATM跌到一仆一碌，阿里未止跌，今日再插水7%；騰訊及美團(03690)分別跌4.8%及5.3%；京東孖寶亦未止瀉，京東健康(06618)半日跌7.7%。暫時呢堆股份都係唔急撈貨住，先觀察等跌定再算，事關阿爺今日追殺阿里，明日唔知心血來潮又搞邊個。至於小米(01810)雖然唔受反壟斷法影響，但股價今早創新高後回吐，年結前有人計數食糊好正常，阿Man喺15元樓下叫買小米時，已有信心小米必可翻一番，家陣超額完成，對大家有晒交代。阿Man仍睇好小米前景，未來萬億市值不是夢，明年就以一萬億市值為目標，即係股價可望向40大關。
科網股暫時要避避，阿Man上周一直叫睇住內需股同新能源股兩個板塊，內需股今日表現突出，多隻股份創上市新高，當中繼有阿Man推介過嘅安踏體育(02020)、思摩爾(06969)、華潤啤酒(00291)，同埋上周新上市嘅海爾智家(06690)。而內需高額消費品嘅汽車股，今日亦見資金追捧，等到頸都長嘅吉利(00175)，今日終升破24元，企穩後望再向上挑戰新高。
除咗阿里之外，半新股泡泡瑪特(09992)亦有機會受政策影響，官媒新華社發文批評「盲盒」熱潮導致畸形消費，並引述專家建議應規管「盲盒」嘅經營模式，隨時又有政策規管，泡泡瑪特半日跌近14%。之前阿Man都講過，投資內地企業，最大嘅風險就係政策風險，不過食得咸魚抵得渴，玩得中資股就預咗有咁嘅風險，風險跟回報成正比，正如京東健康(06618)可以一兩星期升幾個開，回調跌兩三成亦唔應該大驚小怪。
麥狄文
(徐狄怡‧證監會持牌人)
