隔晚美股做好，而人民幣則繼續走強，推動A股喺黃金周長假期後做好，而港股今早創近三星期高位後反覆靠穩。恒指今早高開150點，創24343點近三星期高位，開市不久後回軟，一度倒跌78點，見24114點半日低位，其後喺A股帶動下喘穩。恒指中午報收24216，升22點；國企指數報9670點，升46點；A股長假後復市，滬指半日升1.89%；深成指飆升3.19%；創業板指數曾飆逾4%，半日升3.99%。而香港呢邊嘅恒科指則升64點；半日報收7575點。而港股通今日假後恢復交易，帶動成交半日增至642.93億元，較噚日半日成交增加三成。
藍籌股個別發展，吉利(00175)9月銷量升11%，半日升1.4%，不過睇番吉利幅日線圖，都未見突破，阿Man就唔多建議呢啲位買貨。至於內循環下體品股表現唔錯，申洲(02313)創新高，半日升1.7%，而安踏(02020)雖然唔係藍籌股，但半日升至87.35元，逼近高位。大笨象(00005)跟友邦(01299)分別跌0.2%及1%，逆市向下，亦係令大市曾倒跌嘅原因。而之前強勢嘅聯通(00762)今日跌1.7%；而中移動(00941)則跌0.6%。
阿Man講咗光伏股高追有伏，今日光伏股獲利沽盤空群而出，今日整個板塊食咗瀉藥咁款。之前光伏玻璃第二大龍頭福萊特玻璃(06865)早段曾創28.6元新高，未知係咪北水見福萊特咁好價，忍唔住要食糊，半日倒跌11.2%。一對信義孖寶，信義光能(00968)跟主營太陽能電站嘅信義能源(03868)連升多日後，半日分別跌近一成及13.2%。上日狂升嘅陽光能源(00757)則跌6.7%，協鑫孖寶亦齊齊腳軟。
至於手設股亦係呢幾日喪炒後，今早見獲利沽盤，周末效應令手機股回吐，舜宇(02382)跟瑞聲(02018)半日分別跌1.9%及1.6%。其他手設股最少跌0.6%，較顯著下跌嘅富智康(02038)跌逾4%。科技股普遍做好，阿里巴巴(09988)果然喺螞蟻集團未上市前，阿里落鑊狂炒，創下293元新高，睇嚟300元短線目標好快達標。而美團(03690)亦做好，半日升4.2%，睇走勢喺下月恒指服務公司再作季檢前，美團或有望創新高。而騰訊(00700)跟小米(01810)分別升1.3%及2.4%，騰訊步步好升；小米雖受華為分拆手機業務傳聞所威脅，但股價一直穩守20元之上，阿Man睇好小米長線發展，早已建議股價創新高回落後，於20至22元之間收集，至今呢個睇法無變，對小米前景仍有信心。
麥狄文
(徐狄怡‧證監會持牌人)
