美股隔晚個別發展，道指準備換馬，將被剔出嘅埃克森美孚、輝瑞及雷神科技，股價分別收跌3.22%、1.12%及1.47%，拖累道指下跌，但將於下周一被納入成份股嘅Salesforce、生化公司安進(Amgen)及綜合工業企業Honeywell則顯著上升，升幅由3.2%至5.3%不等。科技股維持強勢，標指跟納指再創收市新高，帶動今日重磅科技股喺港股做好。
恒指今早高開34點，報25520點，升幅曾擴大至116點，見25603點半日高位，但A股走軟，上證指數跌逾1%，拖累港股由升轉跌，一度跌126點，見25360點日低位。中午恒指報收25432點，跌53點；國指報收10279點，跌12點；恒生科技指數半日報收7249點，升25點。
隔晚騰訊(00700)喺ADR延續升勢，重上550元水平，今日曾高見555元，半日報升1%，收550元。阿里巴巴(09988)跟京東(09618)於美股時段同樣做好，今日兩第二上市股喺香港呢邊齊創上市新高，前者升3.6%，而網易(09999)亦升2.9%。小米(01810)今日派成績表。股價半日升3.8%，盤中高見19元今年高位，阿Man早已預期小米落實染藍後，股價不僅可以重返水面，即17元招股價之上，今年內甚至有條件創上市新高，即升越22.2元上市高位。阿Man一直強調ATMX四大科企，缺一不可，之前一直落後嘅阿里跟小米，迎接下月染藍大日子，股價呢一轉加大馬力，終於從後趕上。而今年以嚟走勢一直遙遙領先嘅美團(03690)，今日要回一回氣，但半日僅跌1%，真係想執平貨甚艱難。
之前阿Man喺70元水平推介過頤海國際(01579)，指集團嘅自熱火鍋產品喺內地疫情期間銷售額強勁增長，而其他產品亦受惠宅經濟帶動，公司上半年業績好過預期，業績公布後非但未有見光死，股價更再創126元新高，但半日升幅收窄至7%。跟頤海同系嘅餐飲股海底撈(06862)亦派成績表後創新高，股價半日升3.1%。
手機設備股低處未算低，一對手設龍頭孖寶瑞聲(02018)及舜宇(02382)派成績表後，被大行調低評級及目標價唱淡，而數據公司分析，全球智能手機第二季銷量跌逾兩成至2.95億元，孖寶半日再跌2%及1.9%。其他手設股同樣跌勢未止，噚日已提醒大家咪多手接刀，板塊仍要尋底，未係時候入場撈貨。
除咗手設股之外，近日熱炒嘅唔少新經濟股，包括醫藥醫械股，次一線嘅科技股，呢日唔多棈神，估計係缸邊友沽出呢堆獲利甚深嘅當炒股，套現抽新股農夫山泉(09633)，由於市場反應勁好，國際配售將提早明日截飛，而IPO則維持原判，周五截飛。雖然農夫集資額83.5億元唔算多，不過計一計條數超額過百倍的話，將凍結近萬億資金，難怪呢幾日熱炒新經濟捱過，但個別高增長而前景有睇頭嘅股份，好似阿Man長線睇好嘅思摩爾(06969)跟有雄厚後台背景嘅遊戲股祖龍娛樂(09990)，今日捱沽令股價又見特價，正好搵個靚位上車。
麥狄文
(徐狄怡‧證監會持牌人)
